Бизнис
Пад на деловното расположение во германската автомобилска индустрија
05.06.2024
Деловното расположение во германската автомобилска индустрија повторно се влоши во мај, по едномесечното подобрување во април годинава, е заклучокот на извештајот на Институтот за економски истражувања ИФО од Минхен.
Индикаторот што го мери деловното расположение во автоиндустријата во Германија во мај падна на минус 8,6 поени, во однос на априлските -2,4 поени, пренесе Б92.
- Трговскиот судир за продажбата на електричните возила меѓу Кина и САД, како и со Европската Унија,може да има сериозни последици на работењето на германските производители на автомобили, истакна Оливер Фалк , директорот на ИФО Центарот за индустриска организација и нови технологии.
Производителите на автомобили и нивните добавувачи имаат песимистички очекувања за развивањето на нивниот бизнис во наредните месеци. Компаниите од оваа индустрија се подготвени за отпуштање на работници за полесно да се справат со зголемените трошоци, посочуваат од ИФО.
Во Европската Унија во април се регистрирани 913.995 нови автомобили, што е за 13,7 отсто повеќе од истиот месец лани. Зголемувањето на бројот на нови автомобили во Германија изнесуваше 19,8 отсто, објави Здружението на европски производители.
фото freepic