Бизнис
Потрошувачите во САД се соочуваат со бургерфлација
21.05.2024
Цените во американските синџири за брза храна се зголемени над висината на стапката на инфлација во последните пет месеци. Според податоците на американското Министерство за труд, цените на брзата храна се за 33 отсто повисоки од 2019 година. Во овој период трошоците за набавка на храната се зголемени за 26 отсто, додека вкупниот индекс на потрошувачки цени (ЦПИ) е зголемен за 19 отсто.
Во периодот од 12 месеци односно до март годинава, цените за целото мени се зголемени за 3,2 отсто, а цените на намирниците се зголемени за 1,2 отсто, објави Заводот за статистика на трудот.
Според анализата на порталот „Фајнанс Баз“, цените на најпознатиот американски бренд за брза храна од 2014 година се повисоки за двапати. Така, цената на стандардниот бургер со сирење кој чинел 5,39 долари годинава се продава за 11,99 долари. Високи цени се регистрирани и кај другите ресторани за брза храна, а за споредба еден оброк со пржено пилешко месо е поскапо за 86 отсто, односно од 6,49 доларисега чини 11,39 долари.
Синџирите за брза храна зголемувањето на цените ги образложуваат со зголемената инфлација и со повисоките трошоци за работна сила. Во САД минималната цена на платата во јануари е зголемена, а сега изнесува 20 долари за еден час. Меѓутоа, истражувањето за цените во рестораните за брза храна во Калифорнија укажува на рекордни профитни маржи во индустријата со храна.
Брзата храна во САД стана поскапа и некои потрошувачи ги менуваат своите навики и одлучуваат да готват дома. Купувачите не се подготвени да платат повисоки цени, а тоа го покажуваат и финансиските извештаи, кои бележат пад на прометот кај угостителските компании за околу 3,5 отсто во првите три месеци годинава. Некои од рестораните се обидуваат да ги задржат купувачите со одобрување на разни бонуси и попусти, пренесе НИН.
фото freepic