Бизнис
Германските компании бизнис климата во земјата ја оценуваат како добра или многу добра
16.05.2024г.
Германските компании во земјава ја оценуваат бизнис климата како добра или многу добра, но има тренд на благо намалување на планираните инвестиции, а една од причините за тоа е недостигот на стручни кадри, покажала анкетата спроведена меѓу германските инвеститори и компании членки на Македонско- германското стопанско здружение. Дури 70 проценти од германските компании во земјава сметаат дека недостигот на стручни кадри е еден од најголемите ризици, а недостигот на стручни кадри се одразува врз тековното производство и на намалување на планираните тековни инвестиции.
Доколку овие податоци се споредат со минатите години може да се забележи дека има мало намалување во однос на инвестиците.
- Од анкетираните компании 37 проценти изјавиле дека имаат намера да ги намалат планираните тековни инвестиции, 33 проценти да ги остават на исто ниво, а 30 проценти да ги зголемат инвестициите. Еден од одлучувачките фактори е се поголемиот недостиг на стручни кадри. Педесет и седим проценти сметаат дека и трошоците на работењето се еден од факторите за ризик, а 47 проценти сметат дека влијае и економско-политичката ситуација, истакна Антје Ванделт, директорка на АХК Северна Македонија, надлежна и за Албанија и Косово на денешната прес-конференција во Скопје.
Македонија останува атрактивна локација за инвестирање на германските компании за што говори податокот од анкетата дека 69 проценти од компаниите изјавиле дека повторно би инвестирале во земјава.
- Иако е рано за Нова Година, ние би сакале да ги доставиме нашите новогодишни желби до новата Влада, а тоа се продолжување на отворениот дијалог, консултации со економските тела како коморите и економските здруженија пред да се носат законски измени кои би се одразиле врз работењето на компаниите, зголемување на ефикасноста во делот на административните процеси, како што се издавањето на дозволи за престој, дозволи за работа и поголема трнаспарентност во нивние процеси, како и продолжување и завршување на веќе започнатите инфраструктурни проекти, рече Ванделт.
Во однос на рецесијата во Германија и како таа ќе се одрази врз земјава, според Ванделт, Македонија може да профитира од тоа затоа што германските компании ги префрлаат своите производни капацитети во други држави.
Во земјава има повеќе од 200 германски компании кои вработуваат над 20 илјади вработени и имаат важен удел во инвестициите во Северна Македонија. Во текот на 2023 година има и нови германски инвеститори, но и голем дел од компаниите реинвестирале во државата.