Бизнис
Платите во ИТ секторот во Хрватска бележат реален пад
30.04.2024г.
Просечните плати во информатичко-комуникацискиот сектор во Хрватска во периодот од февруари 2023 до февруари 2024 година бележат реален пад. Според последните податоци на Централниот завод за статистика, просечната нето плата во февруари 2024 година во ИТ секторот изнесува 1.634 евра (2.356 евра бруто), што е зголемување за три отсто. Но, ако се земе предвид стапката на инфлација која во истиот период изнесуваше 4,1 отсто, тоа е реален пад на просечните плати во ИТ.
Во споменатиот период ИТ секторот во Хрватска забележа најниска годишна стапка на раст на платите во споредба со сите други сектори во Хрватска, иако се смета дека е најпропулсивен, и покрај актуелната криза на светската ИТ сцена. Од друга страна, во набљудуваниот период има пораст на бројот на вработени во информатичко-комуникацискиот сектор. Во февруари 2023 година имало 57.880 вработени, а во февруари 2024 година евидентирани се 58.854 вработени, пишува „Лидер медиа“.
Во февруари просечната исплатена нето плата во ИТ секторот била за 59 отсто повисока од просечната нето плата во Хрватска, додека во февруари годинава е повисока за 43 отсто. Ова покажува на стагнација во растот на платите во ИТ секторот, а истиот тренд ќе продолжи и годинава кога се очекува и повисок раст на платите во другите сектори, велат експертите.
фото freepic