Бизнис
ЕУ воведува поголема заштита на купувачите во случај на дефект на апаратот во гарантиот рок
24.04.2024г.
Купувачите можат да избираат меѓу замена за нов производ или поправка
Европската Унија официјално ја усвои новата директива за правото на поправка на апаратите и новите правила треба да го потикнат луѓето да ги поправаат купените производи наместо да купуваат нови.
За директивата за право на поправка на апаратите гласале 584 пратеници, тројца биле против, а 14 гласале воздржано, се наведува на сајтот на Европскиот парламент.
Европската Унија бара од компаниите да понудат минимална двогодишна гаранција на производите, но има и нови обврски за компаниите. Според новите правила, компаниите по истекот на гаранцијата и натаму имаат обврска да ги поправаат вообичаените производи за домаќинство, во кој се вклучени и паметните телефони, телевизорите, машините за перење алишта, правосмукалките и други предмети.
Во иднина, купувачите за расипаниот производ за време на гаранцијата, можат да избираат меѓу замена или поправка. Доколку се одлучат за поправка тогаш гаранцијата се продолжува за уште една година.
Новите правила предвидуваат обврска за компаниите да понудат разумна цена за остранување на дефектот, за да се оневозможи купувачите поради високите трошоци да се откажуваат од поправка на производот.
Европската Унија ќе побара од производителите на апарати да обезбедат резервни делови и алати, а воедно ќе се забрани да се користат „договорните клаузули за користење на хардверска или софтверска техника со кои се оневозможуваат поправките“.
Новите правила ќе стапат на сила кога ќе бидат објавени во Службен весник на ЕУ, а државите членки на Унијата ќе имаат две години за да ги усвојат во своето законодавтсво, пренесе РТВ.
фото freepic