Бизнис
Највисока февруарска плата е исплатена на вработените за компјутерско програмирање
23.04.2024г
Во февруари 2024 година највисока просечна нето-плата во Македонија во висина од 93.852 денари била исплатена на вработените во дејноста компјутерско програмирање и консултантски и сродни дејности. Нивната февруарска плата е повисока за 2,3 отсто во однос на истиот месец лани. Вработените во телекомуникациската дејност имале нето-плата од 65.134 денари (зголемување од 14,4 отсто), објави денеска Државниот завод за статистика на Македонија.
Вработените во производство на основни фармацевтски производи и фармацевтски препарати добиле плата од 61 020 (зголемување од 12.3 отсто). Во секторот за снабдување со електрична енергија, гас, пареа и кјлиматизација во февруари била исплатена нето-плата од 52.221 денар (зголемување од 15,8 отсто). Во градежништвото просечната плата во февруари била 37. 637 денари (зголемување од 13,2 отсто).
Во февруари нето-платата на вработените во секторот уметност, забава и рекреација изнесува 38,405 денари или добиле повисока плата за 20,4 отсто.
Според податоците на Државниот завод за статистика, индексот на просечната месечна исплатена нето-плата по вработен во февруари 2024 година, во однос на февруари 2023 година, изнесува 116.5. Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: јавна управа и одбрана; задолжително социјално осигурување (24.9 %), административни и помошни услужни дејности (22.5 %) и уметност, забава и рекреација (20.4 %).
Намалување на просечната месечна исплатена нето-плата по вработен, во однос на претходниот месец, е забележано во секторите: Транспорт и складирање (10.1 %), Рударство и вадење на камен (7.2 %) и Земјоделство, шумарство и рибарство (6.3 %). Просечната месечна исплатена нето-плата по вработен, во февруари 2024 година, изнесува 39 276 денари.
фото freepic