Бизнис
Продажбата на електрични автомобили ќе порасне на 17 милиони
23.04.2024г
Продажбата на електрични автомобили во 2024 година ќе порасне на 17 милиони во споредба со 2023 година кога се продадени 14 милиони возила. Очекувањата се дека годинава во Кина ќе бидат продадени 10 милиони електрични возила, се наведува во објавената прогноза на Меѓународната агенција за енергија (ИЕА).
- Ниските маржи, нестабилните цени на металите за производство на батерии, високата инфлација, како и постепеното укинување на субвенциите за купување на електрични автомобили предизвикаа загриженост за натамошниот раст на пазарот на автомобили, но податоците за глобалната продажба натаму се силни, се наведува во соопштението на ИЕА.
Повеќе од 20 отсто од вкупната продажба на сите видови на автомобили се однесуваат на електричните возила. Глобалната продажба на електричните автомобили во првиот квартал во 2024 година е зголемена за 25 отсто, но продажбата е променлива во различни региони .
Автомобилите кои имаат внатрешен погон на согорување се поевтини во однос на електричните возила. Тоа е клучна причина за забавениот раст на продажбата на електричните автомобили, пренесува РТВ.
фото freepic