Бизнис
Камионите на граничните премини на Западен Балкан чекаат по десет часа
22.04.2024г.
Доколку просечното време на граничните премини се намали на три часа, БДП на Западен Балкан може да порасне за три отсто. Моментално, на границите меѓу земјите од ЗБ се чека вкупно 26 милиони часа, а просечната цена на фиксните трошоци на транспортните компании е пет евра за еден час. Ова значи дека загубата од преголемото чекање на граничните премини е околу 130 милиони евра годишно, соопштија од Стопанската комора на Србија.
Според последните расположиви податоци, при преминувањето на границататоварните возила чекаат во просек десет часа, а најдолгото време на чекање било 36 часа. Поради тоа, Форумот на стопански комори на земјите од Јадранско-јонскиот регион предложи иницијатива за итни мерки за забрзување и унапредување на протокот на стоката на граничните премини меѓу Европската Унија и Западен Балкан, пишува „Нова економија“.
Трошоците за компаниите кои учествуваат во синџирите за снабдување се значително повисоки поради дополнителните загуби за непотребното чекање и доцнење во испораките на стоките.
- Поради неможноста да се планира времето на граничните премини не може да се планираат и роковите за испорака, како и планирањето на залихите и динамиката на производството, изјави Александар Радовановиќ, раководител на центарот за регионална соработка во Стопанската комора на Србија.
фото freepic