Бизнис
Намалена продажбата на нови автомобили во Европската Унија
18.04.2024г.
Во март помалку се купувале електрични возила
Во земјите од Европската Унија во март се регистрирани 1.031.875 нови автомобили, што е за 5,2 отсто помалку во однос на истиот месец лани, објави Здружението на европските производители на автомобили (АЦЕА).
Ова е прво намалување на продажбата на автомобили во 2024 што се должи на велигденските празници кои негативно се одразија на потрошувачката во ЕУ.
На пазарот во Германија е забележан меѓугодишен пад на проджбата за 6,2 отсто, а намалување имаше и во Шпанија за 4,7 отсто, во Италија за 3,7 отсто и во Франција за 1,5 отсто.
Во март годинава се регистрирани најголем број на возила на бензин кои учествувале со 35,4 отсто, хибридно-електричните возила (ХЕВ) со 29 отсто, електричните возила на батерии (БЕВ) со 13 отсто и автомобилите на дизел учествувале со 12,9 отсто од продажбата на автомобили.
Учеството на електричните возила на батерии во ЕУ е помал од март 2023 година, кога изнесувало 13,9 отсто. Учеството на хибридно-електричните возила (ХЕВ) е зголемено на меѓугодишно ниво во однос на март 2023 година кога изнесуваше 24,4 отсто.
Бројот на ново регистрирани електрични возила на батерии во март е намален за 11,3 отсто односно на 134.397 возила.
Во првиот квартал годинава вкупниот број на регистрирани автомобили во ЕУ е зголемен за 4,4 отсто на меѓугодишно ниво на 2,8 милиони возила, пренесе РТВ.
фото freepic