Бизнис
Силен раст на патничкиот авионски сообраќај во светот
16.04.2024г
На аеродромите во светот минатата година поминале околу 8,5 милиони патници, што е зголемување за 27,2 отсто во однос на 2022 година. Заздравувањето на авионскиот патнички сообраќај влијаеше на промени во редоследот на најпрометните аеродроми, но на прво место останува аеродромот во Атланта, објавија од Меѓународниот совет на аеродроми (АЦИ).
Сепак, бројот на патници во авионскиот сообраќај е под нивото од 2019 година и пред појавата на пандемијата со ковид-19. Лани бројот на патниците е помал за 6,2 отсто во споредба со 2019 година.
Бројот на патниците во домашните авионски линии во светот е зголемен за 20,2 отсто и е на нивото од 96,8 отсто во однос на 2019 година. На меѓународните летови бројот на патниците е зголемен за 36,5 отсто споредено со 2022 година, или 9,6 отсто помалку патници од 2019 година.
Најголем промет на патници лани имало на аеродромот во Атланта (САД) со 104,65 милиони патници. Аеродромот во Дубаи е на второ место со 86,99 милиони патници, а претходно беше на петто место. Пет од десет аеродроми со најголем број на патници се во САД.
Количината на товарниот транспорт со авиони е намалена за 3,1 отсто во однос на 2022 година и изнесува 113 милиони тони. Причината за намалувањето се геополитичките тензии и нарушувањето на глобалните синџири за снабдување. Најголеми аеродроми за товарен транспорт се Хонг Конг, Мемфис и Шангај, пренесе „Сеебиз“.
фото freepic