Вести
Мукаетов: Грижата за здравјето на луѓето мора да остане прв приоритет за секого
Што очекуваат од 2021 година?
Живко Мукаетов, генерален директор на Алкалоид АД Скопје:
Во одговорите на ова прашање за 2020 година, веројатно, никој не беше во состојба да ја предвиди огромната криза со која се соочи светот во неа. А во овој момент веројатно не постои предвидување за 2021 година каде што непријателот ковид-19 не зазема централно место. За само една година сите сфери на животот, вклучително и бизнисот, претрпеа огромни промени, закани и неизвесности. Прилагодувањето на промените беше најголемиот предизвик за сите до сега. Од денешна перспектива јасно е дека 2021 година ќе продолжи во истата насока. Грижата за здравјето на луѓето мора да остане прв приоритет за секого.
Тоа е највисокиот приоритет и за нас во „Алкалоид“. Грижата за здравјето на вработените, добрата организација на работните процеси, прилагодувањето кон промените, континуираното инвестирање во знаење и технологии, во развојот на нови производи и отворањето на нови пазари очекувам, и во овие најтешки околности, да бидат вистинската основа за нова и уште поуспешна деловна година за нашата компанија. Реализираните инвестиции во зголемувањето на нашите производни капацитети ќе ги поддржат одличните перспективи за раст на нашите продажби на сите извозни пазари во 2021 година. Ќе останеме максимално посветени кон остварување на нашите деловни цели, а истовремено и фокусирани кон нашата општествено одговорна улога посебно во вакви неизвесни околности.
Искрено се надевам и посакувам во духот на нашето мото „Здравјето пред сè“, 2021 година конечно да донесе надминување на здравствената криза со што помали економски последици кај деловните субјекти и населението и обезбедување на основните предуслови за побезбеден начин на живот и работење што ќе придонесе за брза ревитализација на економијата и отворање на нови развојни перспективи.