Lifestyle
Кападокија – една од највозбудливите гастрономски дестинации во Туркије
16.02.2026г
Позната по Самовилските оџаци, летањето со балони со топол воздух и античките пештерски живеалишта, Кападокија нуди дополнителна причина за посета, а тоа се незаборавните кулинарски искуства, кои минатата година беа забележани и од „Мишелин“, кој во својот водич вклучи 18 ресторани од Кападокија.
Карактеристично за оваа гастрономска дестинација е што локалните јадења се подготвуваат со употреба на вековни рецепти, традиционални техники на готвење на отворен оган, органски производи одгледани на вулканска почва и ароматично грозје од блиските лозја.
Без разлика дали се модерни или традиционални, рестораните во Кападокија ги освојуваат посетителите со разновидната понуда на уникатни јадења кои го одразуваат богатството на локални состојки. Меѓу овие јадења се нежно засладени чорби со кајсии и друго овошје, како и домашни тестенини послужени со семки од тиква.
Исто така, кулинарската сцена на Кападокија е длабоко вкоренета во турските и анадолските традиции. Поради тоа, рецептите подготвени со традиционални методи на готвење ќе ве однесат на незаборавно патување низ историјата на регионот. Меѓу овие јадења е тести ќебапот, кој традиционално се подготвува во глинени садови произведени во градот Аванос и се готви бавно во тандир рерна. При послужување, глинениот сад драматично се крши пред вашите очи, ослободувајќи врело јадење.
Може да се проба кајис јахниси, мешавина од суви кајсии и месо зготвено на шпорет на дрва, потоа дуња полнета со мелено месо, ореви и зачини, како и агпакла - чорба од бел грав и месо, приготвена во глинен сад. Кулинарското уживање може совршено да се заокружи со низа исклучителни десерти, од инџир јагламаси (смокви зготвени во путер) и десерт од тиква, до долаз (алва од брашно со путер) и баклава дамат.
Локалните сирења какви што се нигде мависи и дивле обрук, зреено во пештера, одлично се комбинираат со регионалните вина. Опкружена со плодни лозја, Кападокија е позната по своите вина направени од анадолски сорти грозје како што се богазкере, наринџе и емир, а посетителите можат да ја истражат винската култура на регионот преку тури и дегустации во локалните винарници.