Економија
ВО ГЕРМАНИЈА ЖИВЕАТ 161.044 ГРАЃАНИ ОД МАКЕДОНИЈА, 16,8 отсто од германското население се странци, најмногу Турци, Украинци...
21.01.2026
Во Германија живеат повеќе од 14 милиони странци. Силниот раст на бројот на Украинци е особено забележлив, а тие наскоро би можеле да ги престигнат Турците и да станат најголемата група странски државјани во земјата.
Според официјалната статистика, во Германија моментално се регистрирани 14.077.867 странци, што претставува околу 16,8 проценти од вкупното население од приближно 83,6 милиони луѓе.
Со децении, турските граѓани ја сочинуваа најголемата група странци во Германија, а денес тие сè уште се на прво место, со 1.522.681 луѓе, но нивната предност брзо се намалува.
На второ место се Украинците, кои моментално бројат 1.402.245, само околу 125 илјади помалку од Турците. Пред руската инвазија на Украина во февруари 2022 година, во Германија живееле само околу 135.000 украински државјани, што покажува колку е голема промената за само неколку години.
Во Германија моментално живеат 414.555 лица од хрватско потекло, што ги става Хрватите на деветтото место меѓу странските државјани.
Има повеќе Бугари (422.787), Авганистанци (448.744), Италијанци (630.247), Полјаци (842.789), Романци (907.185), Сиријци (940.401), Украинци (1.402.245) и Турци (1.522.681) отколку Хрвати.
Групата земји од кои доаѓаат повеќе од 150.000 луѓе ги вклучува и Косово, Индија, Русија, Србија, Ирак, Босна и Херцеговина, Унгарија, Шпанија, Австрија, Кина, Иран, Македонија и Виетнам.
Од нив, 262.479 се од Србија (14-то место), 246.724 од Босна и Херцеговина (16-то место) и 161.044 од Македонија (22-ро место).
Бројот на странци е само дел од пошироката слика. Според микропописот за 2024 година, 25,2 милиони луѓе во Германија имаат мигрантско потекло, што е повеќе од 30 проценти од вкупното население. Оваа група ги вклучува и децата на странци родени во Германија, натурализираните граѓани и таканаречените доцни емигранти од Источна Европа и поранешниот Советски Сојуз.
Од вкупниот број странци, околу 230 илјади луѓе мора да ја напуштат Германија, но повеќето од нив остануваат благодарение на привремен статус, 190.360 луѓе имаат таков статус, додека нешто помалку од 40 илјади се без никаква заштита и формално треба веднаш да ја напуштат земјата, пренесува Пословни дневник.
Фото Економија и бизнис