Финансии / Банкарство
ПРЕЗЕМАЊЕ НА АТИНСКАТА БЕРЗА од европската берзанска група Euronext
20.11.2025
Европската берзанска група Euronext ја презеде Атинската берза, откако 74,2 отсто од акционерите ја прифатиле понудата, а министерот за национална економија и финансии на Грција Кирјакос Пиеракакис, нагласи дека тоа „го одразува напредокот на грчката економија“, јави дописничката на МИА од Атина.
- Аквизицијата на Атинската берза од Euronext претставува една од најзначајните инвестиции во последните децении. Тоа значително ја надградува националната инфраструктура од огромна важност и доаѓа десет години по затворањето на берзата. Прифаќањето на понудата од 74,2 отсто од акционерите покажува дека грчкиот пазар на капитал беше апсолутно подготвен да го преземе овој следен, многу значаен чекор. И, секако, овој потег е целосно усогласен со европската политика на Унијата за штедење и инвестиции, порача Пиеракакис.
Објасни дека со тоа ќе му се овозможи на грчкиот капитален пазар многу поширок пристап до капитал, значително поголема ликвидност и севкупно ќе придонесе за унапредување на грчката економија.
- Ова претставува многу силен глас на доверба во грчката економија и го одразува напредокот што нашата земја го постигна во последните години, додаде министерот за национална економија и финансии на Грција, пренесува МИА.
Фото Економија и бизнис