Финансии / Банкарство
РАСТАТ ТЕНЗИИТЕ ВО ФЕД ПРЕД ДЕКЕМВРИСКИОТ СОСТАНОК, гувернерите поделени во три табора за одлуката за намалување на каматите
17.11.2025
Отпорноста на инфлацијата, послабата видливост во економските податоци и продлабочените поделби во рамките на Федералните резерви ја доведоа монетарната политика на САД до пресвртна точка. Инвеститорите до неодамна речиси со сигурност сметаа на намалување на каматните стапки во декември, но сега исходот е сè понеизвесен, поради тоа што во рамките на ФЕД се формираат три табори: оние кои сакаат поголемо намалување, оние кои веруваат дека инфлацијата е сè уште превисока и оние кои чекаат посигурни податоци. Притоа, двете клучни цели на американската централна банка се избалансирани - стабилни цени и максимална вработеност.
До неодамна, пазарите речиси сигурно очекуваа уште едно намалување на стапките во декември. Дури и некои претставници на Федералните резерви сметаа на трето намалување на стапките во 2025 година.
Пониската каматна стапка помага во вработеноста, но може да ја зголеми инфлацијата. Повисоките каматни стапки ја задушуваат инфлацијата, но го забавуваат пазарот на трудот.
Дополнителен проблем е што Федералните резерви во моментов се потпираат на „приватни“ и делумни извори на информации, бидејќи затворањето на американската влада привремено го запре објавувањето на клучните економски индикатори. Најновите комплетни податоци покажуваат инфлација од 3% на годишна основа и невработеност од 4,3%.
Во октомври, Федералните резерви ја намалија својата референтна каматна стапка за 0,25 процентни поени, на опсег од 3,75%–4,00%, обидувајќи се да го олесни краткорочното задолжување и да го поттикне трошењето во услови на послаб пазар на трудот.
На 14 ноември, Белата куќа објави отстранување на царините за прехранбени производи како што се кафе, банани и мелено говедско месо, но сè уште не е јасно како ова ќе влијае на синџирот на снабдување и трошоците за домаќинствата.
Иако цените на храната сè уште се под притисок, се појавува растечки проблем во услужниот сектор, особено во трошоците за грижа за стари лица и градинките.
Дванаесет членови ќе гласаат на состанокот на ФОМК на 9 и 10 декември. Иако повеќето се согласуваат дека пазарот на трудот се „оладил“, тие се поделени околу тоа колку ризик претставува инфлацијата, пренесува Инвеститор.ме.
Фото Економија и бизнис