Вести
УРАГАНОТ „МИЛТОН“ ОСТАВИ 2 МИЛИОНИ ЛУЃЕ БЕЗ СТРУЈА, во САД наместо на 130 бури се очекуваат на секои 53 години
10.10.2024
Најмалку две лица загинаа во округот Сент Луси на брегот на Атлантикот на Флорида, изјави шерифот на округот, Кит Пирсон.
Пирсон процени дека повеќе од 100 домови во округот се уништени од ураганот „Милтон“, објави Ен-Би-Си Њуз. Претседателот Џозеф Бајден го повика населението на Флорида да се евакуира. Локалните власти и членовите на Националната гарда на Флорида им помагаат на погодените од ураганот.
На Флорида повеќе од два милиони луѓе останаа без струја поради ураганот. Канцелариите на Националната метеоролошка служба на Флорида издадоа повеќе од 130 предупредувања за торнадо од синоќа. Експертите велат дека појавата на торнада пред и за време на ураганите не е невообичаена, но дека моќта на торнадата може да биде силна. Флорида има повеќе торнада на квадратен километар од која било друга држава.
Речиси 100.000 луѓе беа сместени во центрите за евакуација низ Флорида синоќа, изјави извршниот директор на Одделот за управување со вонредни состојби на Флорида, Кевин Гатри. Тој додаде дека вчера попладне имало околу 220.000 легла.
Службите за итни случаи беа суспендирани во Тампа поради ураганот, изјави началникот на противпожарната служба Барбара Трип за Си-Ен-Ен.
Таа додаде дека најмалку 400.000 луѓе се без струја во Тампа.
Вселенскиот центар Кенеди, кој се наоѓа на источниот брег на Флорида, е затворен поради ураганот „Милтон“, потврди НАСА.
-Центарот Кенеди сега е затворен, освен персоналот за одговор при итни случаи. Прогласен е статус на HURCON 1, се вели во соопштението, според Си-Ен-Ен.
НАСА и американската војска ја користат ознаката HURCON за нивото на подготвеност за итни случаи пред пристигнувањето на ураганот, а условите за HURCON 1 обично се прогласуваат 12 часа пред пристигнувањето на ураганот. Суштинските тимови вклучуваат персонал на НАСА кој мора да остане во кампусот на вселенската агенција за да ги поддржи критичните тековни мисии, вклучително и контролата на мисијата за Меѓународната вселенска станица.
Дождовите и ветровите на ураганот Хелена, кој го опустоши југоисточниот дел на САД на крајот на септември и однесе повеќе од 230 животи, беа десет отсто поинтензивни поради климатските промени, се наведува во студија на референтна научна мрежа.
Студијата на World Weather Attribution (WWA), исто така, вели дека поради фосилните горива, кои се главната причина за глобалното затоплување, веројатноста урагани како Хелена да се појават во областа е поголема за два и пол пати.
Наместо на 130, бури се очекуваат на секои 53 години
Со други зборови, наместо да се очекуваат на секои 130 години, сега е поверојатно да се случат во просек на секои 53 години.
Иако бројката од десет проценти може да изгледа релативно ниска, важно е да се истакне дека мала промена во однос на опасноста навистина може да доведе до голема промена во однос на ефектите и штетите, рече Фридерике Ото, која ги предводи мрежите на WWA.
Кога го проучувале ураганот Хелена, научниците се концентрирале на три аспекти – врнежите, ветерот и температурата на водата во Мексиканскиот Залив, што е еден од клучните фактори за неговото формирање.
- Сите аспекти на тој настан се засилени со климатските промени во различен степен. И ќе видиме други феномени од тој тип до степен до кој планетата продолжува да се загрева, рече на прес-конференција коавторот на студијата Бен Кларк, истражувач од Империал колеџ во Лондон.
- Доколку луѓето продолжат да согоруваат фосилни горива, САД ќе се соочат со уште поразорни урагани, предупреди Бен Кларк.
Извор/фото МИА