Вести
Ристовски: Почнавме со санација на спортската инфраструктура
09.10.2024
Македонија по 20 години доби Министерство за спорт. Конечно спорт го доби местото и вниманието што го заслужува. Овие 100 дена активно работевме на подобрување на спортската инфраструктура, обезбедување финансиска поддршка за спортските организации и поттикнување на младите да се занимаваат со спорт, рече Борко Ристовски, министерот за спорт, кој искажа задоволство од сработеното во првите 100 дена од новата Влада.
Ристовски се осврна и на состојбата во спортот која тој и неговиот тим ја затекнаа по неговото назначување.
- Не почнуваме од нула, туку од минус два. Затекнавме нефункционална институција со покренато обвинение за корупција за работата на досегашната Агенција за млади и спорт. Потрошени се милиони државни пари без конкретни резултати. Затекнавме руинирани спортски сали, почнати и недовршени проекти, објекти без елементарни услови за спортски активности, рече меѓу другото Ристовски.
Темелната реконструкција на спортска инфраструктура е основа за нормалното функционирање на спорт и затоа до крајот на годинава Министерството за спорт обезбеди 35 милиони денари, посочи министерот.
Ќе се реновира салата „Расадник, салата во Радовиш, салата во Ново Село, фудбалското игралиште во Тетово, ќе се гради нова атлетска патека, ќе се гради спортска сала во Воената Академија и ќе се санираат 15-20 мултифункционални игралишта.
Покрај подобрување на инфраструктурата, Ристовски кажа дека во 100 дена акцент е ставен и на финансиската поддршка за спортистите.
- Овозможивме значителна финансиска поддршка за спортистите, клубовите и федерациите. Ова помош е клучна за континуитетот на делување и учество на меѓународни натпревари. За поддршка на врвниот спорт обезбедивме и исплативме 83 милиони денари за клубовите и федерациите кои учествуваат на меѓународната сцена, додаде Ристовски.
Извор/фото МИА