Вести
ЕДНО ЛИЦЕ ЗАГИНА ОД БУРАТА „КАСАНДРА“ ВО ГРЦИЈА, во Хрватска реката Купа се излеа кај Карловац
06.10.2024
Бурата „Касандра“ предизвика значителни штети во западна Грција и однесе еден живот во Лепено, известува грчкиот весник „Катимерини“.
Починатиот е 52-годишен чувар на фабрика за асфалт, кој бил пронајден околу шест километри од своето работно место, најверојатно однесен од поплавите. Претходно, пред да се изгуби врската со него, тој му соопштил на својот колега дека блиската река се излеала поради поројните дождови.
Во близина на Стратос и Ривио се пријавени сериозни штети, каде реките ги поплавија подрумите и блокираа автомобили.
На островот Крф, громови предизвикаа прекини во снабдувањето со електрична енергија,а поплавите на улиците предизвикаа наезда на глодари.
Пожарникарите расчистуваат паднати гранки и помагаат на поплавените хотели и продавници. Воздушниот сообраќај беше нарушен, а неколку авиони беа пренасочени
Градоначалникот на хрватскиот град Карловац, Дамир Мандиќ, денеска изјави дека од поплавите вода влегла во 25 семејни куќи, а многу дворови и деловни објекти претрпеле штета. Најтешка е состојбата во Бродарици и Борлин, како и на левиот брег на реката Купа.
Иако штетата е значајна, Мандиќ рече дека не се очекува прогласување на елементарна непогода, пренесува порталот Индекс.
- Штетата ќе ја процениме утре, но веќе сега знаеме дека не е толку голема како претходните години, изјави Мандиќ.
Тој нагласи дека водостојот паднал, граѓаните добиле сушачи за простории, а утре ќе се санира теренот. - Верувам дека до понеделник ќе имаме нормални услови за живот, истакна Мандиќ.
Извор/фото МИА