Вести
ПРЕТСЕДАТЕЛКАТА СИЉАНОВСКА ВО СОФИСКАТА ОПЕРА И БАЛЕТ БЕЗ БУГАРСКИОТ ПРЕТСЕДАТЕЛ - Претседателката на Македонија искажа разбирање што Радев не може да се придружи на изведбата на операта „Набуко“ на Македонската опера и балет во Софија
14.09.2024
Претседателката на Македонија Гордана Сиљановска Давкова вчеравечер во Софија присуствуваше на настапот на македонската Национална опера и балет, што во Софиската опера и балет ја изведе операта „Набуко“ од Џузепе Верди.
На настапот на македонските уметници, со кој беше отворена оперската сезона во Софија, присуствуваа и министерот за надворешни работи и надворешна трговија, Тимчо Муцунски и министерот за култура и туризам, Зоран Љутков, кои се во состав на македонската делегација, соопшти Кабинетот на претседателката.
По вчерашната средбата со бугарскиот колега, претседателката на Македонија изрази желење за несреќата и загинувањето на двајца бугарски пилоти и искажа разбирање што поради тоа Радев не може да се придружи на изведбата на операта „Набуко“ на Македонската опера и балет во Софија. 
Претходно Сиљановска Давкова имаше средба со нејзиниот бугарски колега Румен Радев, по која оцени дека со добра волја, меѓусебна почит и разбирање може да се најде решение за отворените прашања меѓу Скопје и Софија. Шефот на бугарската држава, пак, очекува искажаната желба за дијалог и разбирање од Сиљановска Давкова да стане конзистентна политика на Владата во Скопје и тврди дека Бугарија отсекогаш била отворена за дијалог со Северна Македонија.
- Убедена сум дека разговорот што помина во една дебатна пријатна атмосфера ќе вроди со плод. Не можам да кажам дека утре ќе се случи тоа, но важно е да почнете. Уште еднаш се покажа дека кога ќе седнете и разговарате водени од добра волја bona fide, а не од mala fide ќе направите еден голем исчекор кон пронаоѓање заеднички важни решнија. Јас не сум случајно овде, дојдов за да разговарам, и се разбира дека сега го очекувам претседателот Радев да дојде во Скопје. Мислам дека ако се слушаме, ако се почитуваме, ако имаме волја да се разбереме, тогаш решението е на дофат, изјави претседателката Сиљановска Давкова по првата средба со Радев.
Прашана околу што се согласиле со Радев, таа посочи дека се обединиле околу европската интеграција, копенхашките критериуми, регионалниот пристап на решавање на проблемите. За прашањето околу внесување на Бугарите во Уставот конкретно не станало збор на средбата со Радев, а во врска со нејзиниот став за промената на Уставот, Сиљановска Давкова рече дека одлуките за овие прашања ги носат пратениците во Парламентот и не зависат од ставови на подинци. 
Радев преку соопштение нагласи дека „Бугарија очекува искажаната желба за дијалог и разбирање од страна на претседателката Гордана Сиљановска да стане конзистентна политика на Владата на Република Северна Македонија“. Истакна дека дијалогот на највисоко ниво меѓу двете земји треба да биде активен и да ја стимулира работата на владите, бизнисите, како и билатералната размена во областа на образованието, науката и културата.
Извор МИА
фото: Кабинет на Претседател