Бизнис
Хрватска со зголемени туристички приходи во 2023 година
30.03.2024г.
Хрватска од туризмот остварила 14,6 милијарди евра
Приходите од странските туристи во Хрватска во 2023 година достигнале 14,6 милијарди евра и се зголемиле за 11,4 отсто во однос на 2022 година, соопштија од Министерството за туризам и спорт, врз основа на податоците на Хрватската народна банка.
Во четвртиот квартал лани приходите од странските туристи изнесувале 1,63 милијарди евра што претставува раст од 10,9 отсто во однос на истиот период во 2022 година.
- Овие резултати се заслуга на сите учесници во туристичкиот сектор, а овој позитивен тренд ќе продолжи во иднина, истакна Николина Брњац, министерка за туризам и спорт.
Во 2024 година се очекува да продолжат позитивните физички и финансиски показатели во туристичкиот промет. Позитивни сигнали има и во годинашнава предсезоната. Од почетокот на 2024 година во Хрватска престојувале 971 илјада туристи или десет отсто повеќе во однос на истиот период лани. Исто така, остварени се и осум отсто повеќе ноќевања и нивниот број изнесува 2,6 милиони. Годинава има зголемен промет и од домашните туристи за пет отсто. Зголемен број на туристи во Хрватска има од Словенија, Австрија и од Германија, пишува Сеебиз.
фото freepic