Бизнис
Финансискиот имот на Хрватите се состои во готовина и во депозити
22.03.2024г.
Хрватите имаат натрпосечни познавања за финасиската област, но не се доволно добри во финансиското однесување. Во делот на финансиската дигитална писменост Хрватска е над просекот на Европската Унија и ОЕЦД. Хрватите најмногу пари држат во облик на готовина или во депозити во банките, а ова изнесува 61 отсто од финансискиот имот, што е над просекот од Европската Унија со 44 отсто, изјави Марко Приморац, министерот за финансии, на Конференција за финансиска писменост.
Хрватските граѓани во пензиските фондови инвестирале 29 отсто од сопствениот финансиски потенцијал, што се смета за добра состојба, поради структурата и јакнењето на пензиските столбови. Просекот во ЕУ на овој вид финансиски вложување е 16 отсто.
- Кај животното осигурување податоците се послаби и Хрватска е на дното во Европската Унија со четири отсто финансиски имот во животното осигурување. Слична е состојбата и кај вложувањата во инвестициските фондови и во хартиите од вредност, вели Приморац.
Најголемите предизвици кај финансиската писменост се состојат во тоа што финансиските теми се тешко разбирливи за граѓаните, а некои поединци ги преценуваат своите познавања од областа на финансиите или недоволно планираат за во иднината, смета министерот Марко Приморац.
Економистите од Хрватска забележуваат дека младите лица во земјата недоволно размислуваат за планирањето на пензијата, а граѓаните се недоволно информирани за новите финансиски продукти што ги нуди дигиталната технологија, објави Лидермедија.
фото freepic