Бизнис

Бизнисот и науката заедно до одржливи проекти за зелена транзиција

Економија и бизнис | печатено издание | 01 март 2024г.

• Сподели:

Потребата од усвојување на принципите на циркуларната економија, преку минимизирање на отпадот и на загадувањето, паметно управување со ресурси, промовирање на одржливи производи, со цел паметно искористување на енергијата, стануваат едни од главните предуслови за пристап и за одржување на конкуретноста на европските пазари на земјите од Западен Балкан. Исполнувањата на барањата, на регулативите и на стандардите во областа на циркуларната економија и на заштитата на животната средина веќе стануваат дел од тековните активности на извозно ориентираните компании. На тој пат за зелена транзиција претстојат многу предизвици преку воведување на нови иновативни технологии, паметно користење на ресурсите и реупотреба на материјалите преку воведување на концептот на циркуларната економија.
Со цел сето ова да даде позитивни резултати, а и компаниите не само од земјата туку и глобално од регионот да може да одговорат на предизвиците на зелената тразиција што како законски обврски ги наметнува Европа, претседателот на Стопанската комора на Северна Македонија и воедно претседател на Асоцијацијата на балкански комори за 2024 година и копретседател на Коморскиот инвестициски форум, Бранко Азески, донесе одлука за формирање на Иницијативен одбор за регистрирање на регионален хаб за циркуларна и за зелена економија. Обврската на Иницијативниот одбор кој е составен од повеќе членови, вклучувајќи го претседателот на СКСМ, претседателите на сите комори членки на Асоцијацијата на балкански комори и Коморскиот инвестициски форум, претставници од академскиот сектор, успешни компании и Стопанската комора на Северна Македонија, ќе биде да се изработи концепт и предлог-програма за работа и да се создадат правни услови за регистирање на регионален хаб за циркуларна и за зелена економија.

Идејата е регионалниот хаб за циркуларна и за зелена економија да се издигне како водечка регионална институција чија цел ќе биде изработка на стратешки регионални документи и регионално поврзување и вмрежување на бизнис-секторот и на науката во областа на циркуларната и на зелената економија, обезбедување на техничка и на стручна поддршка во процесот на имплементирање на модерни концепти на циркуларната економија во бизнисот, подготовка на компаниите за целосно усогласување со барањата и со стандардите на ЕУ-пазарот во делот на заштита на животната средина и имплементирањето на еколошките практики, како и трансформација на регионалните економии со цел побрзо интегрирање кон ЕУ.