Бизнис
ЦИРКУЛАРНА ЕКОНОМИЈА – НОВИ СТАНДАРДИ НА ФУНКЦИОНИРАЊЕ НА БИЗНИСОТ
ЗЕЛЕНА, ЦИРКУЛАРНА, КРУЖНА ЕКОНОМИЈА
Економија и бизнис | печатено издание | 01 март 2024г.
Циркуларна економија − многу често експлоатирани зборови во периодов, кои стануваат секојдневие во нашето бизнис-дејствување, но и во стилот на животот на секој човек. А сето тоа под плаштот на зелена економија и здрава животна средина.
Истовремено овие два збора „циркуларна економија“ се можеби и најмистичните кога ќе треба да се објасни што сè се подразбира под циркуларна економија, а следствено на тоа и што се треба да применуваат компаниите во своето бизнис-дејствување во рамката на циркуларната економија.
Како стигнавме до тоа циркуларната економија да стане обврзувачки фактор за бизнисите?
Земјите од регионот, на 10 ноември 2020 година, ја потпишаа Софиската декларација за зелената агенда за Западен Балкан. Тоа е инструмент за постигнување на Европскиот зелен договор во нашиот регион, кој претставува пресвртница во борбата против климатските промени и сеопфатна стратегија за раст на Унијата, а неговата имплементација треба да доведе до климатска неутралност на Европската Унија до 2050 година.
Со потпишување на декларацијата, земјите од ЗБ6 се обврзаа да ја имплементираат Зелената агенда како „патна карта“ за низа конкретни акции и мерки што ќе доведат до развој со минимално испуштање на јаглерод и економски раст во согласност со принципите на одржлив развој.
Во обид да ја приближиме циркуларната економија во секојдневното функционирање на бизнисот како дел од вкупното деловно опкружување и да ја потврдиме важноста и економската оправданост, акцентираме неколку сегменти:
– Претставува определен влог во развојни технологии кој подоцна го мултиплицира приходот. Иако на почеток станува збор за поголем финансиски трошок, тој ќе биде мултиплициран преку бенефитите и приходите од примената на трансформацијата во циркуларната економија.
– Средствата за развој на циркуларна економија ќе може да се обезбедуваат преку разни развојни фондови кои имаат цел да ја мултиплицираат зелената економија, и тоа првенствено во Европа.
– Се добива еден нов економски концепт модел со кој секторите, покрај тоа што ќе бидат упатени и дополнително ќе бидат економски поврзани, ќе придонесат до јакнење на генералната економска слика во државата затоа што кога секторите се покохезивни, тие се поотпорни на надворешни удари и на влијание или на притисоци... (зависност од суровини од надвор).
– Увозот како императив ќе добие нов, но не конкурент, туку партнер од домашните индустриски гранки кои сега можеби не изгледаат поврзано, но преку моделот на циркуларна економија тоа е возможно.
– Моделот, каде што вредноста и ресурсите се одржуваат во економијата што е можно подолго, а создавањето отпад е минимизирано, ги намалува притисоците врз природните ресурси и го поттикнува одржливиот раст.