Бизнис

Ревидирање на наставните програми во средното стручно образование за стекнување дигитални и зелени вештини

Економија и бизнис | печатено издание | 15 февруари 2024г.

• Сподели:

Зелените технологии и дигитализацијата се меѓусебно тесно поврзани и значително ќе влијаат на продуктивноста во економијата и на квалитетот на животот на граѓаните во наредните децении. Дигиталните и зелените технологии ја имаат главната улога во оптимизацијата на производството и во обезбедувањето поефикасно производство придружено со помали емисии на јаглерод диоксид и на отпад, како и во воведувањето нови услуги и производи и нивно полесно прифаќање од страна на потрошувачите. Овој предизвик бара развој на нови дигитални и на зелени вештини и наметнува широк спектар на нови квалификации.
Дигиталната и зелената транзиција се најважниот предизвик и за иднината на економијата во Европската Унија, па затоа од клучно значење на секоја земја е стекнување нови дигитални компетенции и зелени вештини со цел да станат поконкурентни и усогласени со потребите на европскиот пазар.
Процесите со дигитална и зелена транзиција ги препозна Комората и прави напори овој предизвик да го инкорпорира во процесите на образовниот систем за креирање кадар кој, покрај стручни вештини, ќе поседува дигитални вештини за да одговори на новите дититализирани и автоматизирани процеси на работа и на зелените вештини за обезбедување производи или услуги што ја подобруваат енергетската ефикасност, ја прошируваат употребата на обновливите извори на енергија или претставуваат поддршка за еколошката одржливост.
Преку образованието и обуката и новите ревидирани наставни програми им се овозможува на учениците да развиваат компетенции и да стекнат знаења, вештини и ставови неопходни за заштита на животната средина, што ќе помогне во транзицијата кон поправедна и позелена економија и ќе поттикнува севкупен економски развој на државава и поголема конкурентност на европскиот пазар.

Овој предизвик бара инвестиции и добра координација на сите засегнати страни од јавниот, приватниот и меѓународниот сектор. Затоа, со поддршка на проектот „Образование за вработување во Северна Македонија (@Е4Е)“ и заедничко парнерство на Комората и на Центарот за стручно образование и обука, започна процес на редизајнирање на наставните програми за квалификации кои се изучуваат во средното стручно образование за внесување на наставни содржини кои ќе придонесат за развој на зелените и на дигиталните вештини што ќе придонесат за одржување и за обновување на квалитетот на животната средина и избегнување идно оштетување на екосистемите.
Номинирани лица од компаниите, членки на Стопанската комора на Северна Македонија, ќе дадат свој придонес во работните групи за подобрување на наставните програми за стекнување квалификации во секторите: хемија и технологија; земјоделство, рибарство и ветерина; графика; текстил, кожа и слични производи; економија, право и трговија; градежништво и геодезија; машинство и сообраќај, транспорт и складирање.