Бизнис
Младите претприемачи знаат што сакаат. ТИМ 40: „Подготвени сме да помогнеме“
Економија и бизнис | печатено издание | 01 февруари 2024г.
Жарко Димитриоски, претседател на ТИМ-40 Асоцијацијата при Комората
Медиуми, соработници и политички претставници беа дел од неодамнешниот настан „Девет насоки од Тим 40“ чиј домаќин беше Асоцијацијата на млади претприемачи при Стопанската комора, Тим 40. Претседателот на Тим 40, Жарко Димитриоски, претстави низа идеи насочени за помагање на малите и средни бизниси, но и за економското здравје на нацијата воопшто. „Се наоѓаме на крстосница од која ќе имаме значајни промени и сметаме дека многу е важно како ќе се движиме натаму. Затоа, како Тим 40, сакаме да придонесеме кон прогресивна трансформација, а не задржување на статус кво во повеќе економски сегменти“, − велат од Асоцијацијата.
Суштината на иновациите
Настанот прикажа девет иновативни стратегии, секоја прилагодена да одговори на конкретни предизвици и можности во Северна Македонија.
Две даночни иницијативи се веднаш применливи. Едната е за оставање можност за исплата на бонус двојна 13-та плата, односно 14-та плата до износот на 13-тата без дополнителен данок. Со ова ќе се стимулира раст на платите и зголемена потрошувачка во земјава.
Другата е за за секое прво вработување на одредено лице. Идејата вели дека ако го задржи лицето на работа уште најмалку 1 година, работодавецот да добие тримесечно ослободување од придонеси за стимулација на вработување на млади без искуство.
Претседателот на Тим 40, Димитриоски, посочи дека иако е итна и неодложна дигитализацијата на сите папирологии во форма на: фактури, договори, писма, известувања и слично, мора да претходи средување на безбедноста на податоците и на инфраструктурата на која тие се хостираат, посочувајќи го проблемот што владиниот сајт го има со Spamdexing или SEO-спам повеќе од една и пол година и случајот со Фондот за здравствено осигурување ланската година.
Тим 40 потсетија на потребата од креирање на т.н. бела листа на компании кои редовно плаќаат данок и ги подмируваат давачките, а укажаа и на потребата од обуки за користење на вештачка интелигенција како круцијален дел од идното работење на секоја фирма, без разлика на дејноста, за што дадоа и насока за субвенционирање со ваучер систем во соработка со Стопанската комора.
Димитриоски посочи и на визијата да се создаде просперитетен деловен екосистем со концептот на трансформација на неискористените државни простории во деловни центри за стартап и мали и средни претпријатија, пристап кој не само што користи заспани ресурси туку и го негува растот на нови претпријатија од витално значење за економската динамика. „Тогаш кога ќе надминат одреден праг на промет или кога ќе измине одреден период, други доаѓаат на нивно место и ротираат“, – дополни Димитриоски.
Можеби најголем од сите е концептот „Зони на идни можности“. Оваа иницијатива има цел да ги премости регионалните разлики со инвестирање во области со понизок животен и економски стандард, претворајќи ги во центри на можности и раст преку анализа која ќе утврди какви објекти се неопходни во нив – хотели, ресторани, викенд-куќи, трговски центри, фабрики... За инвестицијата би се регистрирале посебни компании кои би имале даночни бенефиции од типот на неплаќање даноци, неплаќање или намалување на придонесите ако работат луѓе од регионот, давање на државно земјиште по ниска цена или за нула денари. Претседателот на Тим 40 го посочи примерот на САД и тамошната даночна реформа од 2018 година со која стартуваше иста ваква иницијатива која до денеска отвори речиси 9 000 такви зони во сите држави на САД.
Во храбар потег за подобрување на културното богатство, Тим 40 предложи создавање на продукциски фонд за домашните филмски продуценти. Оваа иницијатива има цел да се спротивстави на доминацијата на странска содржина и да поттикне енергична локална медиумска продукција, суштинска состојка за културниот идентитет на државава.
Како директна заложба на Асоцијацијата, Димитриоски го посочи и проблемот со непризнавање на македонскиот јазик од страна на најголемата платформа за содржина и за рекламирање во светот, онаа на Гугл. Обиди за решавање на овој огромен проблем имало и порано, но без успех. Албанците, чиј јазик исто така се соочува со непризнавање од американската компанија, веќе имаат поднесено тужба до Гугл во Сан Франциско.
Тим 40: место на идните лидери
Претседателот на Тим 40, Димитриоски, посочи на потребата од соработка и визија. „Младите бизнисмени доаѓаат од реалниот сектор каде што се бараат акциски планови, рокови, етапи, казни и награди. Како што политичките лидери во ЕУ мора да знаат дека Македонија бара да види од Унијата решителност, јасност и искреност во лидерството зашто трпението ѝ е при крај, така и политичките лидери дома мора да се свесни дека младите очекуваат концепт и јасна визија, очекуваат конкретен план од нив и ништо помалку − концепт за здравје, образование, инфраструктура и за тоа каде ќе биде Македонија за 10 години и како ќе стигнеме до таму. Ова се професионалци кои десетина и повеќе години создаваат и плаќаат даноци тука. Знаат точно што сакаат и сакаат да помогнат. Да се фокусираме на најважното и да се обединиме за заеднички цели“, – укажа Димитриоски.