Бизнис
Со над 70 % од извозот насочен кон пазарите на ЕУ, бизнис-заедницата веќе има активна улога во европската интеграција
Ружица Фотиновска, менаџер во Стопанската комора на Северна Македонија
Економија и бизнис | печатено издание | јануари 2024г.
Свесни сме дека очите на многумина се вперени кон нас. И со право. Ние сме Стопанска комора со најголем број кадри, секогаш подготвени да направиме позитивни промени. Затоа сметаме дека и сега треба да го засилиме нашиот ангажман кон европската интеграција, да се посветиме и да вложиме максимален напор кон вградување на европските вредности во нашиот систем.
Да нема никаква дилема, нашите заложби за членство во ЕУ започнаа уште од самиот почеток, иако во јавноста можеби не го добија заслужениот одек. Бројките го потврдуваат тоа. Со над 70 % од извозот насочен кон пазарите на ЕУ, бизнис-заедницата веќе има активна улога во европската интеграција. Но, ниеден аспект од нашите напори за ЕУ-интеграција не е поддржан само со идејата за датум, туку со идејата за подобрување на нашава земја и обезбедување на подобра иднина за граѓаните и за бизнис-заедницата во целина.
Добивањето датум за почеток на преговорите и самите преговори со ЕУ не се цел сама за себе. Тие се елементи на еден процес при што крајна цел, всушност, се реформите и сеопфатно преструктурирање на целото општество за да можеме во даден момент соодветно да се приклучиме на европското семејство на земји. Со или без датум, како земја нас ништо не нè спречува темелно и бескомпромисно да правиме реформи. Тоа си е наша домашна задача што треба да ја завршиме поради нас самите.
Комората формираше и Совет за ЕУ-интеграции за да може преку консултации со компаниите и конкретни анализи да ги зајакне преговарачките капацитети на државава. Не само што ја нудиме нашата експертиза, Стопанската комора во соработка со Европската Унија успешно реализира неколку проекти кои се директен придонес кон зголемување на конкурентноста, зајакнување на можностите за воведување на нови технологии, воведување на стандарди како при самото работење, така и на самите производи.
Бизнисот вели дека департизацијата на институциите е неопходна за олеснување на преговарачкиот процес со ЕУ и ние стоиме зад тоа. И сега, кога во предизборието политичките партии ќе ги подготвуваат своите програми, ги повторуваме нашите заложби. Ние го поддржуваме ангажманот за добро национално водење како неопходен предуслов за напредок. Сметаме дека бизнисот, како активен учесник во овој процес, има право и одговорност да повика на департизација на државните институции, да бара разумно трошење, почитување на законите, создавање на подобри услови за бизнис дејствување.