Бизнис

Преку 1 300 турски компании работат низ разни сектори, Турција е седмиот најголем трговски партнер на Македонија

Економија и бизнис | печатено издание | јануари 2024г.

• Сподели:

Билатералната економска соработка меѓу Турција и Македонија значително порасна во последниве години. Турција е седмиот најголем трговски партнер на Македонија според обемот на надворешна трговија. Билатералната трговија достигна 1 милијарда долари, а возможен е и уште поголем раст. Очекуваме ажурирањето на нашата спогодба за слободна трговија да заврши што поскоро со цел да ја издигнеме билатералната трговија на повисоко ниво и да ги отстраниме трговските бариери меѓу Македонија и Турција зашто трговијата носи мир, а мирот произведува богатство.
Исто така Македонија е важен партнер на полето на инвестициите. Соработуваме во многу сектори, од трговија до индустрија, од енергетика до транспорт, од здравство до земјоделство, од образование до МСП. Над 1 300 турски компании работат низ разни сектори во Македонија, со висина на инвестиции од 1,2 милијарди долари. Турските деловни субјекти се активни во многу сектори, а градежништвото, енергетиката, текстилната индустрија, туризмот и прехранбениот сектор се особено примамливи за турските инвеститори. Соработката со Македонија се проширува во континуитет, особено преку придонесот на инвестициите од нашите компании за обновлива енергија и инфраструктурните проекти што ги спроведуваат нашите изведувачи. На овој начин, со задоволство го поддржуваме развојот на инфраструктурата и придонесуваме за зајакнувањето на македонската економија. ТОББ поздравува и охрабрува секаков вид партнерство, економска соработка и заеднички инвестиции со Македонија.
Она што охрабрува е фактот дека Балканот продолжува да напредува во поглед на достигнувањето на напредните економии од Европската Унија. Меѓутоа, приближувањето се одвива со нерамномерна брзина, што налага наменски реформи за да се консолидира закрепнувањето во правец на одржлив раст. Ваквите напори треба да бидат придружени со побрза зелена транзиција и повеќе инвестиции за да се зајакне отпорноста на природните катастрофи, меѓу кои и во земјоделството. Процесот на пристапување на ЕУ им овозможува на балканските земји да ги зацврстат нивните агенди за структурни реформи и да добијат пристап до дополнително финансирање за да ги поддржат насушните инвестиции. Регионот мора да ја избегне т.н. „стапица на среден приход“ − секторска специјализација за дејности со ниска додадена вредност − за да обезбеди понатамошен напредок. За таа цел, од суштествено значење би било да се постигне вистински напредок во зајакнувањето на институциите и владеењето на правото, доквалификацијата на кадарот за да се одговори на динамичните потреби на пазарот на трудот, во унапредувањето на зелената транзиција и подобрувањето на транспортната, дигиталната и енергетската меѓуповрзаност.