Бизнис
Американските градови се соочуваат со неискористен деловен простор
14.03.2024г.
Популарноста кај американските граѓани за работа од дома ги испразни канцелариите во Соединетите Американски Држави, а тоа влијае и на намалување на вредноста на деловните згради, што им причинува проблеми на сопствениците на деловен простор, кои треба да ги враќаат заемите кај банките.
- Банките ќе имаат проблеми, но не големи, изјави Џером Пауел, претседателот на американската централна банка ФЕД.
Канцелариите во деловните згради во градовите Сан Франциско, Вашингтон и Њујорк се полупразни во споредба со периодот пред пандемијата, затоа што службениците од средната класа не сакаат да се вратат во канцелариите и секојдневно да патуваат на работа.
Стапката на празни канцеларии во САД од 9,5 отсто во 2019 година достигна 13,5 отсто во 2023 година. Процените на агенцијата за кредитен рејтинг Фич се дека оваа стапка ќе расте до 16,6 отсто.
Во многу градови од внатрешноста на САД деловните простории се слабо искористени. Промената на навиките на работниците ќе предизвика губиток на вредноста на недвижностите за комерцијална намена. Според податоците на Здружението на хипотекарни банки од 737 милијарди долари хипотекарни кредити за канцелариски простор 206 милијарди долари доспеваат за наплата оваа година, кога каматните стапки се највисоки во последните 20 години. Ова значи дека дел од овие заеми ќе треба да се рефинансираат.
Економскиот аналитичар Лаел Бреинард очекува „стрес“ за банкарскиот сектор, поради кризата на деловниот недвижен сектор, но тоа нема да има пошироки импликации на финансискиот состав, пренесува Лидер медиа.
фото freepic