Бизнис
Кроневски: Компании не се дигитално подготвени за глобалната конкуренција
07.03.2024г.
Македонија 2025 предлага стратегија за целосна дигитализација на јавните услуги
На малите и средни компании им е потребна вистинска поддршка во процесот на дигитализацијата. Само една третина од компаниите се дигитално подготвени и поседуваат работници со дигитални вештини, кои се подготвени да влезат на глобалните економски текови во светот. Кај малите претпријатија само една од пет имаат дигитален капацитет, а другите не се подготвени за овие современи текови. Затоа е потребен сеопфатен систем што ќе го стимулира процесот на дигитализација во македонските компании, посочи Васко Кроневски, заменик претседател на Одборот на директори на организацијата Македонија 2025, на презентацијата на планот Една визија за забрзан раст.
Според него, дигитализацијата е една од системските мерки за забрзан раст на Македонија. Во таа насока тој предлага стратегија за сеопфатна дигитализација и оптимизација во давањето на административните услуги за граѓаните и компаниите.
- Потребен ни е долгорочен план со краткорочни цели. Секоја година најмалу 20 услуги да бидат дигитализирани. Ова треба да биде водено од извршната власт заедно со ресорните министерства со спроведување на годишни акциски планови, рече Кроневски.
Од другите приоритети во дигитализацијата тој ги спомена надминувањето на проблемот со бироктратските бариери во вадењето на документите за компаниите. Третатат мерка се однесува на дигитализација на услугите од локалната самоуправа, што подразбира градење на заедничка платформа за сите општини.
- Ова значи целосна дигитализација на државните служби на централно и локално ниво, како и креирање систем за поддршка за дигитализација на микро, малите и средните претпријатија. Македонија2025 веќе се вклучи во реализација на една од овие мерки, преку основање на Центар за дигитална трансформација ‘Go Digital’, кој го ставаме на располагање за исполнување на целите во оваа област, вели Кроневски.