Бизнис
ЕБОР ја поддржува зелената експанзија на водечкиот малопродажен ланец на маркети во Северна Македонија
23.02.2024г.
- - ЕУР 6 милиони кредит за поддршка на растот на КАМ, водечкиот малопродажен ланец на маркети во Северна Македонија
- - Позелени продавници, подобрување на енергетската ефикасност како дел од стратегијата за раст
- - ЕБОР ќе ја поддржи компанијата во натамошниот оперативен развој
Европската банка за обнова и развој (ЕБОР) потпиша кредит во износ од ЕУР 6 милиони со КАМ, водечки малопродажен ланец на маркети во Северна Македонија. Со кредитот ќе се финансираат плановите на компанијата за проширување на ланецот на малопродажни маркети во земјата, реновирање на постоечките продавници и логистички капацитети со што ќе се унапреди нивната енергетска ефикасност покрај подобрувањата во останатите сегменти.
КАМ ќе користи средства за надградба на дистрибутивниот центар, а Банката ќе ја поддржи компанијата со тоа што ќе и помогне во имплементација на Методот за еколошка проценка на одржливоста и ефикасноста на изградените објекти (анг. BREEAM). Овој вид на сертифицирање е новитет на малопродажниот пазар во земјата и ги рангира објектите врз основа на нивните одржливи карактеристики.
ЕБОР ќе ја поддржи компанијата во натамошниот развој преку советодавни програми финансирани од ЕУ, кои што ќе се фокусираат на неколку аспекти од работењето на КАМ вклучувајќи зајакнување на стратешкиот менаџмент и подобрување во корпоративното управување.
КАМ е водечки малопородажен ланец на маркети во Северна Македонија и прв ланец на хард-дисконт продавници на Западен Балкан. Компанијата има 80 продавници во 20 града, а од неодамна ги прошири активностите во Бугарија и Косово.
Откако Северна Македонија се приклучи на ЕБОР во 1993 година, ЕБОР има инвестирано над ЕУР 2.7 милијарди во 186 проекти, од кои скоро половина се во приватниот сектор. Приоритет на Банката за земјата е да ја поддржува конкурентноста, зелената транзиција и натамошната интеграција во регионалните и глобалните пазари