Бизнис
ДТУ Апекс ДООЕЛ Скопје: Oрганизаторите плаќаат огромни суми на ДДВ, но се исклучени од правото да бараат поврат
Групација на игри на среќа
Економија и бизнис | печатено издание | мај 2023г.
ДТУ Апекс ДООЕЛ Скопје е компанија која организира игри на среќа во автомат клубовите Апекс и припаѓа на Групацијата Новоматик и Апекс Македонија. Организаторите на игри на среќа имаат законска обврска за плаќање посебна давачка во вкупен износ од 23 %, од кои 1,5 % одат за потребите на јавното здравство и 1,5 % за потребите на Агенцијата за млади и спорт, а останатите 20 % директно се слеваат во централниот буџет. Казината и автомат клубовите дополнително плаќаат годишно и за секоја лиценца која им ја издава Министерството за финансии на организаторите во строго дефинирана процедура, а конечно ја одобрува Владата. Правните лица плаќаат и годишен данок на добивка по стапка од 10 %. Плус за секоја поединечно остварена добивка од играње имаат обврска да платат 15 % данок. Исплаќаат плати за вработените и придонеси од работен однос, со двојни дневници за работа во недела, празници, ноќен труд и сменско работење бидејќи работното време е 24/7 за 10 илјади вработени. Државниот буџет се полни од овој економски сектор и преку оданочување на закупнини на деловни простории, ДДВ преку купување опрема, мебел, надоместоци за струја и давање угостителски услуги со кои се поддржуваат десетици илјади други работни места надвор од игрите на среќа. Конечно, организаторите плаќаат огромни суми на ДДВ, но се исклучени од правото да бараат поврат. Кога ќе се сумираат приходите и расходите, за организаторите на игри на среќа останува 10 % од кои треба да ги покријат трошоците за инвестициите и да остварат заработка што е основна цел на секој бизнис, односно профитите со кои дежурните критичари на игрите на среќа шпекулираат дека наводно се остваруваат во Северна Македонија од оваа економска дејност се нереални да се замислат, а камоли да се реализираат. Доколку надлежните институции и покрај сите предупредувања решат да ги спроведат предложените законски измени, тогаш ќе треба во блиска иднина да ѝ објаснат на јавноста зошто се откажуваат од сериозен удел во буџетските приливи и свесно или несвесно ќе создадат предуслови за некој да профитира на црно без никаква контрола од државава.