Вести

Јосифовски: Со јавен долг над 60 % од БДП, РСМ е сериозно задолжена земја и во 2021 година можни се проблеми во финансискиот сектор

• Сподели:

Андреја Јосифовски, претседател на УО на Макпетрол АД:

Новата 2021 година очекувам да биде уште една тешка година за македонската економија. Ковид кризата ќе продолжи и во првата половина од 2021 година, а заздравувањето на економијата може да се очекува во III и IV квартал од годината.
Владата на РСМ, покрај социјалната помош за граѓаните и помошта на малите и средни претпријатија, мора повеќе да води грижа за големите компании и за извозно ориентираните фирми бидејќи тие со својата моќ можат најмногу да придонесат за излез на земјава од рецесија.
Во 2021 година потребна е висока реализација на капиталните инвестиции, функционален парламент и побрза динамика на усогласување на домашното законодавство со eвропските директиви.
Со јавен долг над 60 % од БДП, РСМ е сериозно задолжена земја и во 2021 година можни се проблеми во финансискиот сектор.
Oчекувам 2021 година да биде успешна за Макпетрол АД Скопје на деловен план. Компанијата ќе го продолжи својот развој во енергетската сфера.
Ќе продолжиме со инвестиции во еколошки горива кои ќе значат заштита на животната средина преку намалување на емисијата на штетни гасови.
Следната 2021 година е изборна година во РСМ (треба да се одржат локални избори). Би им препорачал на политичарите и од позицијата и од опозицијата да посветат многу повеќе внимание на економската состојба во земјава, а не како досега во сите изборни циклуси, на своите лични интереси.