Вести
НАЈРАЗВИЕНИТЕ ЕВРОПСКИ ДРЖАВИ САКААТ СОЗДАВАЊЕ ЦРНА ЛИСТА НА ДАНОЧНИ РАЕВИ
Министрите за финансии на Франција, на Германија, на Италија, на Шпанија и на Обединетото Кралство претставија план за развој на стандард за автоматска размена на корисни информации за сопственоста, соопшти Организацијата за економска соработка и развој (ОЕЦД). Всушност, тоа претставува „црна листа на даночните раеви“, а во предлогот, освен тоа, се предвидуваат санкции за земјите кои одбиваат соработка. Германија, Велика Британија, Франција, Италија и Шпанија, познати како Г-5, сакаат исто така да се укине тајната на идентитетот на сопствениците на фиктивните фирми. Новиот план за размена на информации за реалната сопственост на средствата се огласува по откритијата во аферата „панамски документи“. Министрите на ЕУ го фокусираа вниманието на употребата на „сивите“ структури за прикривање на идентитетот на лицата за кои се тврди дека заобиколуваат санкции, перат пари или кријат даноци. Даночните афери во Панама му наштетија на меѓународниот углед на земјата и властите се обидуваат да коригираат дел од штетата со ветување за двострана автоматска размена на информации во иднина.