Германските медиуми пишуваат за можноста за вклучување на земјите од Западен Балкан во Шенген зоната, но и за спорот околу плановите на Берлин за намалување на квотата за работни мигранти од регионот.
Проширувањето на Шенген зоната кон Западен Балкан е во интерес на Европската Унија, пишува Кристоф Бендер, заменик-претседател на независниот истражувачки центар Европска иницијатива за стабилност (ESI), во гостински коментар за весникот Ноје Цирхер Цајтунг (NZZ).
„Европската Унија треба да им понуди на земјите од Западен Балкан план за приклучување кон Шенген зоната, европската зона на слободно движење без гранични контроли. Ова би бил добредојден поттик за кредибилитетот на ЕУ. А бидејќи соседите во Шенген зоната мора тесно да соработуваат во безбедносните прашања, тоа би бил и начин поранешните соперници да ги надминат своите гранични спорови и да придонесат за траен мир“, истакнува Бендер.
Тој забележува дека е тешко за ЕУ да постигне влијание, дури и во нејзиното непосредно соседство – и ова, според него, е токму областа во која ги постигнала своите најуспешни резултати во надворешната политика. Во исто време, тој додава дека преку проширување, ги претворила земјите од поранешниот Источен блок во просперитетни, мирни демократии.
Бендер наведува дека нудењето план за членство во Шенген би бил иновативен начин за ЕУ да го зајакне својот кредибилитет и да создаде дополнителни стимулации за реформи, и објаснува како би можело да функционира:
„Земјите-членки би ја задолжиле Комисијата да создаде каталог на критериуми: шенгенското acquis – контрола на надворешните граници, визна политика, шенгенски информативен систем, полициска соработка, заштита на податоци – со дополнителни услови во областа на владеењето на правото. Комисијата би известувала за напредокот на секои шест месеци, и штом земјата ги исполни сите критериуми, земјите-членки би морале да дадат согласност во Советот на ЕУ. Реформите и поблиската соработка што произлегува од нив можат да ја зајакнат безбедноста, наместо да ја ослабат.“
Во статија со наслов „Зависиме од работната сила од Западен Балкан“, германскиот весник Цајт пишува за плановите на владата во Берлин да го намали бројот на работни мигранти од Југоисточна Европа што доаѓаат во земјата. Авторот Зимон Лангеман пишува за таканаречените „Прописи за Западен Балкан“:
„Прописи за Западен Балкан? Никогаш не сте слушнале за тоа? Не е ни чудо. Работниците мигранти од Албанија, Босна и Херцеговина, Косово, Црна Гора, Северна Македонија и Србија ретко се во фокусот на дебатите за миграција. Можеби и затоа што нивната имиграција функционира без многу бучава. Луѓето од тие шест земји, за разлика од повеќето имигранти, не мора да докажуваат познавање на германскиот јазик или професионални квалификации. Им треба само работа во Германија. И среќа да добијат едно од местата предвидени со годишната квота – која моментално изнесува 50.000, пренесува Дојче веле.
Фото Економија и бизнис
