Германија се соочува со сè поголеми проблеми во воздушниот транспорт поради високите трошоци, кои директно влијаат на цените на авионските билети и бројот на достапни летови. Авиокомпаниите предупредуваат дека летањето од Германија е поскапо отколку во која било друга европска земја, поради што во последните години откажаа бројни линии, а некои од преостанатите ги одржуваат многу поретко.
При купување авионски билет, патниците не плаќаат само за своето место во авионот. Во цената се вклучени различни такси, меѓу кои се трошоците за безбедносни контроли на аеродромите, услуги за контрола на воздушниот сообраќај и патнички и аеродромски такси.
Во зависност од растојанието на летот, овие такси можат да изнесуваат помеѓу 13 и 60 евра по патник, што дополнително ја зголемува вкупната цена на патувањето.
Германското здружение за воздушен транспорт (BDL) особено предупредува за проблемот со високите трошоци, кое смета дека условите за бизнис во Германија станале значително понеповолни отколку во остатокот од Европа.
Последиците се веќе видливи во понудата на летови. Од 2019 година, бројот на авионски линии од германските аеродроми е значително намален. Според податоците на BDL, тогаш имало околу 1.700 линии, додека денес има малку повеќе од 1.500.
Портпаролот на ова здружение, Александар Клеј, за германскиот јавен сервис ARD изјави дека проблемот не е само во намалувањето на бројот на линии, туку и во фреквенцијата на летовите.
Високите трошоци за воздушен транспорт станаа важно политичко прашање и во Германија. Во текот на летото, Бундестагот одлучи да го намали данокот на воздушен сообраќај, но претставниците на воздухопловната индустрија сметаат дека оваа мерка не е доволна.
BDL бара дополнително намалување, па дури и целосно укинување на овој данок, со образложение дека таков потег би можел да ја подобри конкурентноста на германските аеродроми и да спречи понатамошно откажување на линии.
За можноста за дополнително олеснување на воздушниот сообраќај зборуваше и германскиот канцелар Фридрих Мерц, кој покажа отвореност кон оваа идеја, пренесува Радиосарајево.ба.
Фото Економија и бизнис
