Цената на златото повторно падна до 3.900 долари за унца, продолжувајќи го трендот на опаѓање по рекордните вредности достигнати на почетокот на годината. Додека високите каматни стапки, силниот долар и растечките цени на нафтата вршат притисок врз пазарот, централните банки продолжуваат со големи купувања на овој скапоцен метал.
Спот цената на златото се намали за 1,1 процент на околу 3.903 долари за унца, додека американските фјучерси за декември паднаа за 1,4 проценти на околу 3.914 долари.
Падот на цената на златото во последните месеци беше многу изразен. Златото достигна рекордно високо ниво од 5.594,82 долари за унца кон крајот на јануари, а оттогаш изгуби околу 30 проценти од својата вредност.
Една од главните причини за новиот пад се цените на нафтата.
Нивниот пораст ги зголеми стравувањата дека инфлацијата во Соединетите Американски Држави би можела да остане висока, зголемувајќи ја можноста за уште едно зголемување на каматните стапки од страна на Федералните резерви на САД (ФЕД).
Пазарите моментално проценуваат дека постои околу 76 проценти шанса ФЕД да ги зголеми каматните стапки во декември.
Ова е неповолно за златото бидејќи, за разлика од обврзниците или банкарските депозити, тоа не заработува камата. Колку се повисоки каматните стапки, толку помалку привлечно станува да се чува злато.
Повисоките цени на нафтата ги зголемуваат инфлациските притисоци, а со нив и очекувањата за каматните стапки, што е негативно за златото, нагласуваат економските експерти.
Средната проценка за просечната цена на златото оваа година е 4.495 долари за унца, додека во 2027 година се очекува закрепнување на просек од 4.650 долари.
Светскиот совет за злато во вторник соопшти дека централните банки купиле 321 тони злато во третиот квартал, што е зголемување од 42 проценти во однос на истиот период претходната година.
Тоа беше најголемата квартална набавка од крајот на 2024 година.
Од почетокот на годината, централните банки купија 675 тони злато, што е за 6 проценти повеќе во однос на истиот период минатата година. Меѓу најголемите јавно пријавени купувачи беа Кина и Полска, пренесува Дневник.рс.
Фото Економија и бизнис
