Во својот говор пред Европскиот парламент, канадскиот премиер Марк Карни го поздрави предлогот Канада да стане прва придружна членка на Европската Унија, но рече дека не сака поблискиот сојуз да доведе до создавање нов блок што ќе се натпреварува со големите светски сили.
Говорот доаѓа откако американскиот претседател Доналд Трамп изјави дека предложениот аранжман може да претставува „непријателски чин“ и ѝ се закани на Европа со високи тарифи доколку ги смета своите намери за непријателски. Трамп, исто така, ја нарече идејата „смешна“.
„Ја поздравуваме оваа амбиција“, рече Карни пред Европскиот парламент, осврнувајќи се на предлогот на претседателката на Европската комисија, Урсула фон дер Лајен, кој беше претставен во среда.
„Канада и Европската Унија можат да бидат столб што ќе ги зајакне нашите темели и нашите вредности, а во исто време ќе создаде заштитна рамка под која нашите граѓани можат да напредуваат“.
„Ова е прашање на суверенитет, нашата способност да живееме онака како што сакаме. Станува збор за слободи за кои мора да се бориме секој ден, бидејќи суверенитетот бара отпорност – способност да се издржат шокови и потреси“, рече Карни, според Гардијан.
Карни отворено кажа што предлага: подлабока интеграција на Канада и Европа во областите на трговија, одбрана, критични минерали, вештачка интелигенција, енергија, вселена, истражување и финансиски услуги, така што двете страни ќе бидат помалку ранливи на економски и геополитички притисоци, пишува АП.
Алијансата ЕУ-Канада не е замислена како „трет блок“ или соперник на големите сили.
Карни рече дека сака да биде конкретен за тоа што не предлага:
„Не предлагам создавање трет блок кој би им конкурирал на големите сили, само со подобри манири.“
Таа вели дека сојузот Канада-ЕУ би бил светилник за другите демократии – сојуз кој нема да биде дефиниран според она на што се спротивставува, туку според она за што се залага: слобода, солидарност, просперитет и одржливост, пренесува Денес.
Фото Економија и бизнис
