Економијата на еврозоната порасна двојно побрзо од очекуваното, и покрај неочекуваниот пад во Франција, повисоката инфлација и распродажбата на пазарот на обврзници.
Бруто домашниот производ (БДП) на еврозоната, порасна за 0,4 проценти во третиот квартал, објави Евростат. Најголемите членки забележаа различни резултати: економиите на Германија и Шпанија пораснаа, Италија стагнираше, а Франција падна за 0,1 процент, објавува Capital.ba.
Вкупниот резултат укажува на отпорноста на европската економија, како на инфлаторните последици од војната во Иран, така и на топлотните бранови и сушите што го карактеризираа поголемиот дел од летото. Сепак, Европската централна банка (ЕЦБ) предупреди на ризиците од забавување на растот и може да ги зголеми каматните стапки по трет пат во декември.
Во октомври во Италија годишната инфлација достигна 5,6 проценти и 3,8 проценти во Франција, што претставува највисоки нивоа од 2023 година и ги надмина очекувањата.
Во Шпанија, инфлацијата малку забави, во согласност со очекувањата, но сепак остана висока на 4,9 проценти.
Растечките приноси на обврзници низ целиот свет дополнително го оптоваруваат економијата, додека нестабилната фискална и политичка ситуација во Франција продолжува да привлекува најголемо внимание во блокот. Дури и пред актуелните настани, Франција беше меѓу најголемите сопирачки за растот на еврозоната: во првата половина од годината, едвај избегна рецесија поради слабата домашна побарувачка и падот на инвестициите, додека високите температури негативно влијаеја на земјоделството.
Германскиот БДП порасна за 0,2 проценти, и покрај пречките како што се ниските нивоа на водата во Рајна. Силното зголемување на владините трошоци за инфраструктура и одбрана поттикнува оптимизам, додека производителите на автомобили би можеле да имаат корист од забраната на Европа за увоз на кинески хибридни возила.
Италијанската влада очекува раст на БДП од еден процент оваа година, што би помогнало во финансирањето на дел од даночните олеснувања што ги вети премиерката Џорџа Мелони пред изборите следната година, пренесува РТЦГ.
Фото Економија и бизнис
