Економија
Европејците планираат повеќе патувања, подолги престои и поголеми буџети
25.04.2025
Европејците оваа пролет и лето ќе манифестираат променливото однесување при патувањето, покажува новото истражување од Европската комисија за патувања (ETC).
Вкупните намери за патување се пониски од минатата година (72 проценти, што е намалување од 3 проценти во однос на оние кои имаат намера да патуваат оваа година), но патниците од Европа планираат подолг престој, да трошат повеќе и ќе ги диверзифицираат своите дестинации, се наведува во извештајот „Мониторинг на расположението за патување во Европа“.
Земјите со најголема намера за патување на жителите се: Полска (80 отсто), Велика Британија (79), Холандија (75), Шпанија (75) и Италија (73 отсто).
Традиционалните медитерански туристички центри бележат мал пад на популарноста, за осум проценти, додека расте интересот за патување во Источна Европа, за три проценти повеќе од претходната година.
Помеѓу април и септември годинава, 27 проценти од Европејците планираат да патуваат три или повеќе пати. Ова е значително зголемување од шест проценти во споредба со истиот период минатата година. Патниците имаат намера да останат подолго, при што 42 проценти се одлучуваат за одмор од седум до 12 ноќевања, што е зголемување од 11 проценти во однос на 2024 година.
Зголемените буџети за патувања укажуваат дека Европејците продолжуваат да им даваат приоритет на патувањата во нивните лични трошоци. Речиси една третина од Европејците (30 проценти од нив) планираат да потрошат помеѓу 1.501 и 2.500 евра по лице по патување, што е зголемување од седум проценти. Други 17 проценти очекуваат да потрошат повеќе од 2.500 евра.
Патниците што избираат помалку популарни локации имаат тенденција да останат подолго, пренесува Бизнис.рс.