На состанокот на Европскиот совет беа дискутирани и европската конкурентност, буџетот на Унијата и поддршката за Украина
Претседателката на Европската комисија (ЕК), Урсула фон дер Лајен, вчера изјави дека состанокот на Европскиот совет бил долг и значаен и дека биле дискутирани енергетиката, европската конкурентност, трговските односи меѓу ЕУ и Кина, буџетот на Унијата, како и поддршката за Украина и прашањето за миграцијата.
Фон дер Лајен на заедничката прес-конференција со претседателот на Европскиот совет, Антонио Коста, по состанокот на Советот во Брисел изјави дека ЕУ ќе преземе шест мерки за стабилизирање на енергетскиот пазар, вклучувајќи ослободување на 100 милиони барели нафта и дизел во текот на следните четири месеци, како и започнување стратешки дијалог за европските рафинерии, чија цел е зголемување на бројот на рафинерии во Унијата и намалување на цените.
Таа најави дека ќе се подобри работата на работната група, која треба да го овласти операторот на пазарот да влезе на глобалниот пазар и да ги купи потребните извори на енергија на ниво на Европската Унија.
Како среднорочни мерки, Фон дер Лајен изјави дека е потребно земјите-членки на ЕУ да се префрлат на прифатливи, чисти и домашни извори на енергија – нуклеарна енергија и обновливи извори.
„Треба да го промениме начинот на кој трошиме енергија, со замена на странските фосилни горива со електрична енергија произведена во Европа. Исто така, треба да ги модернизираме и подобриме нашите електрични мрежи. Евтината енергија треба да стигне таму каде што е потребна“, рече Фон дер Лајен.
Таа истакна дека членките на ЕУ минатата година инсталирале 80 гигавати капацитет за производство на енергија од обновливи извори, но дека шест пати поголем капацитет чека да биде поврзан со мрежата.
Како важна тема на состанокот, Фон дер Лајен ги истакна економските и трговските односи меѓу ЕУ и Кина, вклучително и трговските нерамнотежи, наведувајќи дека трговскиот дефицит на Унијата со Кина во 2025 година изнесувал една милијарда евра дневно.
„Сите се согласуваме дека Кина е важен трговски партнер на ЕУ. Сакаме тоа партнерство да биде фер, избалансирано и заемно корисно. Сепак, ова бара значително ребалансирање, и тоа брзо“, рече Фон дер Лајен.
Таа истакна дека нерамнотежата во трговијата на ЕУ со Кина е неодржлива и не смее да продолжи.
„Прво, ќе дејствуваме преку дијалог. Но, дијалогот мора да донесе резултати. Консултациите во Пекинг веќе ги дадоа првите резултати: Кина се согласи да го ограничи извозот на хибридни возила за прв пат; пристапот до пазарот е подобрен за одредени индустриски и земјоделско-прехранбени производи од ЕУ, а постигната е поголема предвидливост во однос на контролата на извозот, особено кога станува збор за ретки минерали и магнети“, рече фон дер Лајен.
Таа, исто така, најави дека ЕУ ќе воведе дополнителни заштитни мерки и ќе работи на развој на нови инструменти за решавање на структурните нерамнотежи, пренесува Политика.
Фото Економија и бизнис
