Јеменските Хути, поддржани од Иран, ја презедоа одговорноста за нападот врз два саудиски танкери за нафта во Црвеното Море, дополнително ескалирајќи ја кризата на глобалните нафтени рути.

„Нападнавме два саудиски танкери за нафта, поради нивното кршење на одлуката за блокада издадена од вооружените сили“, изјави портпаролот на војската на Хутите, Јахја Сари.

Саудиската новинска агенција (SPA), повикувајќи се на официјални извори од Генералниот директорат за транспорт, потврди дека еден танкер бил погоден и дека избувнал пожар на бродот, но дека сите членови на екипажот се безбедни.

„Овие напади се кршење на меѓународните закони и конвенции што ја гарантираат безбедноста на трговските бродови и нивните екипажи“, соопшти саудиската агенција, додека деталите за другиот нападнат брод не беа објавени.

Откако сообраќајот низ Ормуската Теснина беше практично прекинат поради конфликтот меѓу САД и Израел против Иран, Саудиска Арабија се обиде да го пренасочи извозот на нафта преку алтернативна рута низ Црвеното Море и теснецот Баб ал-Мандеб.

Теснецот Баб ал-Мандеб, кој го поврзува Црвеното Море со Аденскиот Залив, е широк само 29 километри на најтесната точка, а околу пет проценти од светската нафта минува низ него.

Експертите предупредуваат дека, заедно со веќе затворениот Ормуската Теснина, потенцијалната блокада на Баб ал-Мандеб би можела да отстрани од циркулација дури 25 проценти од светските резерви на нафта и гас, што би предизвикало несогледливи последици за глобалниот пазар на енергија, пренесува Н1.

Фото Економија и бизнис