Европа се подготвува за уште една неизвесна зима, со најниски резерви на природен гас за овој период од годината од 2021 година и со намален увоз на течен природен гас (LNG). Конфликтите на Блискиот Исток, заедно со зголемената побарувачка од азиските земји, дополнително го намалуваат снабдувањето, поради што цените на гасот повторно бележат силен раст. Аналитичарите предупредуваат дека европските складишта најверојатно нема да ја достигнат планираната исполнетост пред почетокот на грејната сезона, пренесува Ројтерс.
Дополнителен притисок создава и пазарот на дизел, кој е клучен за транспортот, индустријата и производството на масло за греење. Војната на Блискиот Исток ги наруши извозните рути, додека Русија воведе забрана за извоз на дизел поради намаленото домашно производство. Поради тоа, европските резерви на дизел се на најниско ниво од 2022 година, а цените достигнуваат рекордни вредности, што веќе доведува до намалување на потрошувачката.
Иако повисоките цени би можеле да привлечат дополнителни количини течен природен гас кон Европа, експертите оценуваат дека глобалниот пазар ќе остане затегнат уште со месеци. Тоа значи дека многу ќе зависи од временските услови – блага зима би можела да спречи поголеми проблеми, но подолг студен период би ја изложил Европа на сериозен ризик од нова енергетска криза.
