Дипломатскиот клуб – Скопје и Правниот факултет „Јустинијан Први“ при Универзитетот „Св. Кирил и Методиј“-Скопје денеска организираат конференција „30 години на европскиот пат: Односите Северна Македонија-ЕУ и патот напред“.

Конференцијата, што ќе се одржи на Правниот факултет, има за цел да се одбележат две значајни пресвртници во односите меѓу нашата држава и Европската Унија: 30 години од воспоставувањето дипломатски односи и 25 години од потпишувањето на Спогодбата за стабилизација и асоцијација. Овие настани, како што нагласуваат организаторите, ја дефинираа траекторијата, суштината и отпорноста на нашето партнерство и го отворија патот на процесот на европска интеграција на земјава.

Обраќања на конференцијата ќе имаат министерот за европски прашања Беким Сали и амбасадорот на ЕУ Михалис Рокас, по што ќе следат два тематски панели за геополитичкиот контекст на проширувањето, улогата на младите и можностите за повторно активирање на европскиот пат, како и за владеењето на правото и економската конвергенција како неопходни темели за кредибилен и заслужен процес на пристапување.

– Конференцијата доаѓа во критичен момент за иднината на проширувањето на ЕУ и дава навремена можност не само да се размисли за постигнатиот напредок, туку и да се потврди стратешката посветеност на европската интеграција. Во контекст на еволуирачката геополитичка динамика и обновените дебати за улогата и кредибилитетот на Европската Унија, настанот има за цел да обезбеди платформа за суштински и напреден дијалог меѓу високи креатори на политики, дипломати, академски лидери и претставници на деловната заедница и младите, посочуваат организаторите.

Фото Економија и бизнис