Компаниите во еврозоната се соочија со понатамошно зголемување на каматните стапки на банкарските кредити и влошување на условите за финансирање во третиот квартал од 2026 година, при што многу од нив пријавија пад на профитот, според кварталното истражување на Европската централна банка за пристап до финансии за компаниите (SAFE) објавено денес.
Компаниите што пријавија зголемување на цената на кредитите се значително побројни од оние што пријавија намалување, а ова особено се однесува на големите компании, се забележува во извештајот.
Околу 46 проценти од компаниите пријавија понатамошно зголемување на каматата на банкарските кредити, во споредба со 42 проценти во претходниот квартал.
Банките ги зголемија надоместоците и провизиите, а почесто бараат гаранции, на пример имот како обезбедување за кредит.
Во исто време, банките даваат помалку кредити отколку порано, а компаниите очекуваат дека во следните три месеци ќе биде уште потешко да се добие надворешно финансирање, првенствено поради лошите економски перспективи.
Дополнително, сè поголем број компании пријавија пад на профитот.
Во третиот квартал, нето 21 процент од компаниите изјавиле дека нивниот профит се намалил, во споредба со 16 проценти во претходниот квартал.
Приходите продолжија да растат кај големите компании, додека кај малите и средните компании тие претежно стагнираа.
Меѓу најголемите проблеми во бизнисот се високите трошоци за производство и работа, како и недостатокот на квалификувани работници, пренесува Еуроњуз.рс.
Фото Економија и бизнис
