Доколку Исланд гласа на референдумот на крајот од месецот за рестартирање на преговорите за членство во ЕУ, таа земја и Црна Гора би можеле да станат членки на Унијата истовремено, а Брисел, велат европските претставници и дипломати, е отворен за идејата двете земји да се приклучат кон ЕУ „во пакет“.

Европската комесарка за проширување Марта Кос изјави за порталот Политико со седиште во Брисел дека Исланд е „посебен случај“ бидејќи е членка на Европската економска зона и Шенген, предвидувајќи дека преговорите би можеле да траат само „една до две години“ ако на 29 август се гласа за рестартирање на преговорите.

Висок функционер на Европската комисија вклучен во проширувањето потврди дека Исланд брзо ќе ја стигне Црна Гора, која затвори повеќе од половина од 33-те преговарачки поглавја и сака да влезе во ЕУ во 2028 година.

Друг функционер на Комисијата рече дека постои голема можност за пакетот Црна Гора-Исланд, каде што членовите би го ратификувале членството на двете земји.

Како што додаде тој, Исланд е богата земја и би бил нето придонесувач во буџетот на ЕУ и со тоа всушност би платил за членството на Црна Гора, која би била меѓу најсиромашните членки на блокот.

Порталот од Брисел потсетува на заедничкото пристапување во ЕУ на Шпанија и Португалија во 1986 година и на Бугарија и Романија во 2007 година, по што членовите потоа ратификуваа договор за пристапување. Десет земји се приклучија на ЕУ во 2004 година во согласност со еден договор.

Најновите анкети покажуваат дека Исланѓаните се поделени околу повторното отворање на преговорите со ЕУ, кои Рејкјавик ги замрзна во 2013 година делумно поради спор со Брисел околу правата за риболов.

Откако ќе завршат преговорите, доколку ги има, Исланд ќе мора да одржи уште еден референдум за членство во ЕУ.

Фото Економија и бизнис