Економија
Сушата го намалува земјоделското производство во Турција
29.01.2026
Поради долготрајните суши, приносите во Турција нагло опаѓаат. Експертите предупредуваат на ризикот од сериозна криза со храна и можна масовна емиграција на населението од руралните региони.
Турција неколку пати во изминатите години ги трпеше последиците од сушите. Сушата од 2025 година беше дури и една од најтешките во последните децении. Во тоа време, количината на врнежи на ниво на целата земја беше најниска во последните 52 години. Регионите околу Црното Море и Медитеранот беа особено погодени, објавува Дојче Веле.
Сушата имаше директно влијание врз земјоделството. Според турското Министерство за земјоделство, во многу области се пријавени „ефекти од земјоделска суша“ односно загуби на приноси.
Мразовите дополнително ја влошија ситуацијата: во случајот со одредени видови овошје, беа погодени до 70 проценти од плантажите.
Според Турскиот институт за статистика, вкупното производство на овошје е намалено за околу 30 проценти, додека производството на житни култури е намалено за 12 проценти.
Падот на нивото на водата во акумулациите, намалувањето на подземните води и ненадејните мразови го прават производството сè поранливо. Производството на црвено месо се намали, како и производството на млеко. Пониски приноси, зголемување на цените на добиточната храна и намалување на обработливото земјиште - сето ова го зголемува притисокот врз производителите и потрошувачите.
Според податоците на заводот за статистика, трошоците за одредени основни земјоделски ресурси се дуплирале во изминатите години. Храната и безалкохолните пијалоци исто така станаа поскапи, речиси 40 проценти само во 2025 година, пренесува НИН.
Фото Економија и бизнис