Вести
АМЕРИКАНЦИТЕ НЕГОДУВААТ ПО УРИВАЊЕТО НА ИСТОЧНОТО КРИЛО НА БЕЛАТА КУЌА, Трамп гради сала за балови
25.10.2025
Багери и тешка механизација за три дена целосно го срушија источното крило на Белата куќа, со цел да се направи простор за новиот проект на претседателот Доналд Трамп, сала за бал од 90.000 квадратни метри, вредна околу 300 милиони долари. Проектот, кој Белата куќа прво го опиша како „модернизација“, предизвика огромен бран негодување кај јавноста и кај експертите за зачувување на културното наследство, пренесува Нова.
Администрацијата на Трамп јавно не објави дека историското крило ќе биде целосно урнато. Дури кога багерите почнаа да ги уриваат ѕидовите, стана јасно дека зградата нема да биде реставрирана, туку отстранета.
Според документите објавени од Вашингтон пост, новото крило треба да содржи сала за бал, канцеларии за првата дама и неколку луксузни апартмани за „претседателски гости“.
Историчарите и архитектите проценија дека Трамп уништил дел од американското наследство кое е старо повеќе од еден век. Источното крило е додадено во 1902 година, за време на администрацијата на Теодор Рузвелт, и оттогаш е „јавна порта“ кон Белата куќа - низ која поминале милиони посетители на туристички тури, разгледувајќи ја градината „Џеки Кенеди“ и историски фотографии од претседателот.
Претседателот на САД, Доналд Трамп, ги негираше написите на одредени медиуми дека планира да ја именува балската сала вредна 300 милиони долари, која се гради во источното крило на Белата куќа, по себе.
„Немам намера да ја именувам по себе. Тоа беше лажна вест. Веројатно ќе ја наречеме Претседателска балска сала или нешто слично. Сè уште не сме размислувале за име“, им рече Трамп на новинарите додека ја напушташе Белата куќа пред да се упати кон Азија, пренесува Еуроњуз.
Фото МИА