Бизнис
Во Србија се дава можност цената на струјата да биде и „негативна“
08.10.2025
Во Србија се разгледува можноста за воведување опцијата за цената на електричната енергија да биде негативна, што е една од клучните иновации предвидени во предлогот за измени на Правилата за работа на пазарот на електрична енергија.
Целта на предлогот, за кој заврши јавната дискусија, е да се хармонизира домашниот пазар со практиките што веќе постојат во Европа и да се прилагоди системот на растечкиот удел на обновливи извори на енергија.
Претходно важеше принципот дека електричната енергија е најевтина ноќе, а најскапа преку ден. Меѓутоа, со зголемениот број на електрани што користат обновливи извори (ОИЕ), таа логика фундаментално се менува, објаснува професорот Никола Рајаковиќ од Електротехничкиот факултет во Белград во интервју за „Недељник“.
Кога производството од обновливи извори, кое зависи од временските услови, ја надминува моменталната побарувачка на потрошувачите, во мрежата се создава вишок енергија.
За да се одржи рамнотежата и да се избегне технички сложеното и скапо исклучување на електраните, понекогаш е попрофитабилно за производителите да нудат енергија по негативна цена односно да платат некому да го потроши вишокот.
Во предложениот законски текст се наведува дека „цената за порамнување за несовпаѓање на билансот е цена што може да биде позитивна, нула или негативна“.
Ова значи дека отстапувањата помеѓу планираната и реализираната потрошувачка ќе се пресметуваат дури и при негативна цена. Дефинирана е и долната граница, па затоа се предлага цената „да не може да биде пониска од 15.000 €/MWh“.
Доколку се усвојат, овие промени најмногу ќе влијаат на големите индустриски потрошувачи и идните сопственици на системи за складирање енергија, кои ќе можат да ги искористат периодите на негативни цени за евтино да ги полнат своите капацитети, објави Недељник.
Фото Економија и бизнис