Бизнис
ГРЧКИТЕ ВЛАСТИ ЌЕ ГО ПРОВЕРУВААТ „СИВОТО“ ИЗНАЈМУВАЊЕ НА АПАРТМАНИ ВО СОПСТВЕНОСТ НА ГРАЃАНИ ОД БАЛКАНОТ
17.09.2025
Граѓаните на Србија, Бугарија, Македонија и Романија покажуваат постојан интерес за купување недвижности во Грција. Главната причина е близината, која им овозможува да го поминат одморот во нова куќа или стан, но и да заработат дополнителни пари со издавање под наем на имотот кога не живеат таму.
Процесот на купување е едноставен, честопати бара само една посета на Грција, а останатите формалности ги извршува адвокат. Најголема побарувачка меѓу купувачите од Србија е за недвижности во северна Грција, а особено на популарниот Халкидики, каде што просечната цена по квадратен метар е 2.600 евра.
Сепак, се поставува прашањето дали секој го регистрира овој бизнис и плаќа даноци, пишува EuronewsSerbia.
Во последните две години има вистински бум во купувањето недвижности од страна на странци, особено од Балканот и Израел. Сепак, грчките власти сега наводно ги таргетираат балканските купувачи поради серија нелегални издавања под наем на имот.
Изнајмувањето имоти без плаќање даноци и дозволи создава нелојална конкуренција за локалните бизниси. Трговската комора на Халкидики предупреди дека проблемот расте и најави мерки против ваквите појави.
Грчките медиуми известуваат дека се случуваат неверојатни ситуации, каде што цели автобуси полни со гости од земјите на потекло на сопствениците доаѓаат во истите куќи секоја година, претставувајќи се како роднини или блиски пријатели, создавајќи впечаток на големо „семејно собирање“.
Грчките власти би можеле да ги усогласат мерките со новиот систем за регистрација на влезови во Шенген зоната, кој се спроведува од 12 октомври, грчките гранични служби би можеле да побараат од туристите каде ќе престојуваат, пренесува Дневник.
Фото Економија и бизнис