Вести
Еврокомисија распиша конкурс за учество на фестивалот „Нов европски Баухаус 2026“
11.07.2025
Европската комисија распиша конкурс на кој архитекти, граѓани, компании, културни дејци, иноватори и истражувачи ќе можат да ги достават своите предлози за учество на третото издание на фестивалот „Нов европски Баухаус 2026“, што е предвидено да се одржи во Брисел од 9 до 13 јуни 2026 година.
Фестивалот се одржува на секој две години и е насочен кон креирање на привлечни, инклузивни и одржливи простори за живеење. Од 2023 година право за учество на фестивалот, покрај субјекти од земјите членки на ЕУ, имаат и поединци и институции и од државите од Западниот Балкан.
Фестивалското издание во 2026 година има за цел да ја нагласи улогата на „демократското ангажирање во обликувањето на иднината“.
Предлозите на конкурсот можат да се доставуваат во три категории: „Саем“, каде ќе бидат претставени проекти што ги поддржуваат вредностите на „Новиот европски Баухаус“; „Фестивал“, наменети за конвергенција на културата, уметноста и заедницата и „Придружни настани“ за проекти поврзани со вредностите на Баухаус, што ќе бидат организирани независно во Брисел и ширум Европа.
Рокот за пријавување за категориите „Саем“ и „Фестивал“ е до 30 септември 2025 година, а за „Придружни настани“ до 31 декември 2025 година.
„Новиот европски Баухаус“ е проект насочен кон спојување на иновациите, амбицијата и креативноста на сите Европејци за изградба на одржлива и инклузивна иднина „убава за очите, умот и душата“.
Тој е замислен како мост помеѓу светот на науката, технологијата, уметноста и културата со што еколошките и дигиталните предизвици би се искористиле за трансформација на животите на луѓето кон подобро, преку заедничко решавање на сложените општествени проблеми и промени на европските општества. Основни вредности на „Новиот европски Баухаус“ се одржливост, естетика и инклузија.
„Новиот европски Баухаус“ има за цел да ги спои граѓаните, експертите, бизнисите и институциите во преосмислување на одржливиот живот во Европа, но и пошироко, обезбедувајќи финансии за реализација на привлечни, одржливи и инклузивни проекти.
Извор/фото МИА